Skólastefna sveitafélagsins Árborgar “grunnskólar”  

• Stefna Sveitarfélagsins Árborgar er að efla grunnskóla sveitarfélagsins, með menntun og mannrækt að leiðarljósi.
• Grunnskólar Árborgar skulu vera metnaðarfullar menntastofnanir og meðal styrkustu stoða samfélagsins.
• Húsnæði og aðstaða skólanna skal vera eins og best verður á kosið, svo starfsemin geti blómstrað og nemendum og starfsfólki líði vel.
• Lög, reglugerðir og aðalnámskrá grunnskóla marka rammann um starfið, ásamt ákvörðunum bæjarstjórnar hverju sinni.
• Lögð verði áhersla á rekstrarlegt sjálfstæði skóla og ábyrgð þeirra vel skilgreind.
• Hlutverk sveitarfélagsins er að marka stefnu í skólamálum, framfylgja henni og hafa eftirlit með rekstri og ráðstöfun þess fjár sem lagt er til fræðslumála.
• Skólastefnu Árborgar skal endurskoða á 3ja – 5 ára fresti hið minnsta, meta hvað áunnist hefur og varða leiðina til framtíðar í ljósi þess. 

Leiðarljós grunnskóla Árborgar  

• að grunnskólar sveitarfélagsins standist samanburð við bestu skóla innan lands og utan
• að lögð verði áhersla á að rækta með nemendum sjálfstæð vinnubrögð, félagslega færni og ábyrgð
• að faglegur metnaður ríki og einkenni allt skólastarf í sveitarfélaginu
• að hagsmunir nemandans séu ávallt í fyrirrúmi í starfsemi skólanna í Árborg
• að skólarnir stuðli að fjölbreyttum kennsluháttum til að virkja sem best hæfileika nemenda
• að stuðlað sé að jákvæðum viðhorfum til menntunar og skólastarfs í sveitarfélaginu
• að nemendur njóti alhliða menntunar við hæfi hvers og eins sem taki mið af eigin samfélagi og alþjóðlegu í senn
• að samvinna ríki milli skóla og skólastiga í sveitarfélaginu
• að menntun og skólastarf í Árborg stuðli að metnaði, vinnusemi og góðri líðan nemenda
• að skólarnir hafi frumkvæði að öflugri samvinnu við heimilin
• að skólastarfið sé metið reglulega og umbótaáætlanir kynntar 

Markmið og leiðir næstu 5 árin   

 Samstarf heimila og skóla verði styrkt á markvissan hátt  

• Aukin áhersla verði lögð á þátttöku foreldra í skólastarfi enda er það ein mikilvægasta forsenda þess að börn þeirra nái árangri í námi
• Foreldrar verði upplýstir reglulega um námsgengi barna sinna
• Skólinn gangist fyrir fræðslu til foreldra um uppeldis- og menntamál í samvinnu við samtök þeirra
• Skólinn bjóði nemendum og foreldrum ráðgjöf ef árangur er óviðunandi
• Áhersla verði lögð á markvisst forvarnastarf í samstarfi við foreldra frá og með 1. bekk
• Foreldrar bera frumábyrgð á námi og hegðun barna sinna

Tónlistarkennsla verði aukin til muna  

• Fornám verði í tónlist í 1. – 4. bekk
• Ávallt verði starfandi tónmenntakennarar við skólana
• Markvisst verði unnið að því að efla söng- og tónlistarlíf í skólunum 

Samstarf skóla og skólastiga verði aukið  

• Heildstæð skólastefna verði í sveitarfélaginu
• Áhersla skal lögð á samstarf grunnskóla sveitarfélagsins eins og kostur er
• Markvisst verði unnið að því að auka samstarf leik- og grunnskóla, til dæmis með það að markmiði að auðvelda nemendum að færast milli skólastiga
• Samstarf verði milli grunnskólanna og Tónlistarskóla Árnesinga
• Samvinna verði við Fjölbrautaskóla Suðurlands vegna nemenda í 9. og 10. bekk og sérdeildar 

Skólarnir nálgist það markmið að verða meðal þeirra bestu

• Allar kennarastöður verði mannaðar réttindafólki
• Stuðlað sé að faglegri umræðu innan skólanna
• Þróunarverkefni séu metin reglulega og árangur þeirra metinn
• Líðan nemenda sé metin frá ári til árs og stefnt markvisst að því að gera hana sem besta
• Fylgst sé með námsgengi nemenda að loknum grunnskóla, til dæmis í samanburði við aðra skóla
• Kappkostað verði að við skólana starfi vel menntað og metnaðarfullt starfsfólk og það hvatt til sí- og endurmenntunar
• Skólarnir setji sér vel skilgreind markmið og noti mismunandi mælikvarða til að meta árangur og líðan nemenda
• Sett séu háleit markmið um námsárangur 

Unnið verði markvisst að vinnusemi og metnaði nemenda  

• Vefir skólanna verði nýttir markvisst til fræðslu og upplýsingagjafar
• Kappkostað sé að velja vinnuaðferðir og verkefni sem vakið geta áhuga og höfða til ólíkra einstaklinga
• Afburðanemendum sé sinnt sérstaklega með verkefnum og vinnubrögðum við hæfi
• Stutt verði sérstaklega við nemendur sem eiga erfitt með nám
• Nemendasamningar verði nýttir þegar þurfa þykir og þeim fylgt eftir
• Stuðlað sé markvisst að því að nemendur taki ábyrgð á eigin námi 

Fjölbreytni verði aukin í náms- og kennsluaðferðum  

• Ýtt verði undir nýbreytni og þróunarstarf innan skólanna
• Námsgreinar verði teknar reglulega til skoðunar, sérfræðingar kallaðir til samstarfs með kennurum og nýjungar teknar upp
• Á öllum skólastigum verði áhersla lögð á að kynna nemendum nánasta umhverfi sitt og lífríki þess
• Vægi þemanáms og hópvinnu verði umtalsvert
• Markvisst og samfellt forvarnastarf verði á öllum skólastigum
• Stuðlað verði að umbótasinnuðum viðhorfum og vinnubrögðum meðal starfsmanna

Rekstrarlegt sjálfstæði skólanna verði aukið  

• Ákveðin fjárhæð sé ætluð skólunum á hverju ári, m.a. með hliðsjón af nemendafjölda
• Skólarnir ráðstafi fé sínu og forgangsraði verkefnum
• Gerð verði 3-5 ára fjárhags- og framkvæmdaáætlun í samstarfi við starfsfólk skólanna
• Rekstrarleg ábyrgð skólanna verði skilgreind 

Aðstaða í skólunum verði sveitarfélaginu til sóma  

• Kappkostað verði að skólarnir og umhverfi þeirra sé aðlaðandi og vistlegt
• Aðkoma að skólunum sé örugg fyrir gangandi, hjólandi og aðra umferð
• Aðgengi fatlaðra sé til fyrirmyndar
• Nemendur og starfsfólk eigi kost á heitri máltíð í skólanum og hafi góða aðstöðu til að neyta matar síns
• Leiksvæði og tæki séu við hæfi nemenda
• Allir starfsmenn hafi góða vinnuaðstöðu 

 

Þannig afgreidd á fundi skólanefndar grunnskóla

13. desember 2007 
Sigurður Bjarnason
Verkefnastjóri