5.8.2014 | Brúarhlaup Selfoss með nýju sniði

Forsíða » Fréttir » Brúarhlaup Selfoss með nýju sniði

image_pdfimage_print

Vegna þróunar undanfarinna ára þar sem þátttakendum í Brúarhlaupi Selfoss hefur fækkað töluvert, bæði heildarfjölda þátttakenda og einnig í einstaka vegalengdum, hefur verið ákveðið að gera töluverðar breytingar á fyrirkomulagi hlaupsins. Dagsetningu hlaupsins hefur verið breytt, vegalengdum fækkað og hlaupaleiðir verið færðar inn í Selfossbæ í fallegt umhverfi og á göngustígakerfi bæjarins. 

Hlaupið fer fram laugardaginn 9. ágúst. Hlaupavegalengdir eru 10 km,  5 km og 2,8 km. Einnig fer fram keppni í 5 km hjólreiðum. Hlauparar í 10 km verða ræstir á Ölfusárbrú kl. 11:30 og hlauparar í 5 km hlaupi kl. 11:45. Hjólreiðamenn í 5 km verða ræstir undir/við Ölfusárbrú  kl. 11:00 og keppendur í 2,8 km skemmtiskokki verða ræstir í miðbæjargarði Selfoss kl. 11:45. Allir þátttakendur koma í mark í miðbæjargarði Selfoss.

Allar hlaupaleiðir eru löggildar og mældar upp af viðurkenndum aðila. Tímataka er í öllum vegalengdum, bæði hlaupa og hjólreiða.  Flokkaskipting er í 10 km hlaupi og eru veittir verðlaunapeningar fyrir 1.-3. sæti í hverjum aldursflokki.  Allir þátttakendur fá við skráningu keppnisbol  og verðlaunapening við komu í mark. Skráningargjöld í forskráningu eru 1.000 kr. fyrir 16 ára og eldri og 700 kr. fyrir 15 ára og yngri í allar keppnisgreinar, nema í 10 km hlaupi þar sem skráningagjaldið er 3.000 kr. Veittur er fjölskylduafsláttur þannig að hjón borga fullt gjald, fyrir sig og tvö börn, en ef um fleiri börn er að ræða fá þau frítt. Forskráningu líkur á netinu á hlaup.is, föstudaginn 8. ágúst kl. 16.

Eftir að forskráningu líkur eru skráningargjöldin 1500 kr., fyrir 16 ára og eldri og 1.000 kr. fyrir 15 ára og yngri. Einnig hækkar skráningargjald í 10 km hlaupi í 3.500 kr.  Þeir sem ekki vilja fá bol merktan hlaupinu geta afþakkað hann í forskráningu og lækkar þá keppnisgjaldið um 500 kr.  Bolirnir eru úr efni sem notað er í hlaupafatnað.

Skráning fer fram á hlaup.is og í Landsbankanum á Selfossi meðan forskráning er í gangi, en einnig á hlaupadag frá kl. 09:00 í Landsbankanum á Selfossi.  Afhending keppnisgagna, til þeirra sem hafa forskráð sig, er á hlaupadag við Landsbankann á Selfossi, frá kl. 09:00.

Verðlaunapeningar eru veittir fyrir þrjú fyrstu sætin í 10 km hlaupi í öllum aldursflokkum, bæði kyn.  Einnig eru veitt verðlaun fyrir þrjú efstu sætin í 10 km hlaupi, bæði kvenna og karla. Einnig eru veittir verðlaunapeningar fyrir þrjú fyrstu sætin í öðrum vegalengdum óháð kyni. Að auki verða dregin út útdráttarverðlaun úr hópi keppenda, um leið og keppendur koma í mark. Verðlaunaafhending fer fram í garði Landsbankans á Selfossi kl. 14.00.

Allir keppendur fá frítt í sunda eftir hlaup, í boði Sveitarfélagsins Árborgar, gegn framvísun keppnisnúmers. Úrslit verða birt á hlaup.is. Frekari upplýsingar gefur Helgi Sigurður Haraldsson, helgihar@simnet.is Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. og í síma 825-2130.

Hér má sjá kort/mynd af hlaupaleiðum

Brúarhlaup Selfoss – Facebook síða

Frétt af vef dfs.is