17.5.2017 | Regnbogafáninn dreginn að húni

Forsíða » Fréttir » Regnbogafáninn dreginn að húni

image_pdfimage_print

Alþjóðlegur baráttudagur gegn homo-, bi- og transfóbíu (fælni gagnvart samkynhneigðum, tvíkynhneigðum og transfólki) er haldinn 17. maí ár hvert, en þann dag árið 1990 var samkynhneigð tekin út af sjúkdómalista Alþjóða heilbrigðisstofnunarinnar.
Sveitarfélagið Árborg fagnar fjölbreytni mannlífsins og vill vekja athygli á rétti allra til fyllstu mannréttinda. Því er regnbogafáninn dreginn að húni við ráðhúsið í dag.

Eftirfarandi er tekið úr dreifibréfi frá Samtökunum 78 sem gefið var út fyrir nokkrum árum:

 „Hómó-, bi- og transfóbía (e. homophobia, biphobia and transphobia) er lýst sem neikvæðum viðhorfum, tilfinningum og/eða neikvæðri hegðun gagnvart hinsegin fólki (t.d. gagnvart samkynhneigðum, tvíkynhneigðum og transfólki). Það getur lýst sér í andúð, fyrirlitningu, lítilsvirðingu, fordómum, fælni eða jafnvel hatri gagnvart hinsegin fólki og er oftast byggt á hræðslu og fáfræði varðandi málefni og líf hinsegin fólks.

Hómófóbía og transfóbía er enn í dag vandamál bæði hérlendis og erlendis og hefur þessi hræðsla lengi leitt til mismununar, sjúkdómsvæðingar, kúgunar og ofbeldis gagnvart hinsegin fólki í gegnum aldanna rás. Sjálfsvígstíðni hinsegin fólks er hærri en meðal annarra samkvæmt mörgum rannsóknum og bendum við í því samhengi á rannsókn sem var gerð hérlendis á sjálfsvígstíðni unglinga þar sem kom í ljós aukin hætta á sjálfsvígum meðal samkynhneigðra unglinga.“