30.9.2019 | Þjónustuver Ráðhúss Árborgar færist á 1.hæð í bókasafnið

Forsíða » Fréttir » Þjónustuver Ráðhúss Árborgar færist á 1.hæð í bókasafnið

image_pdfimage_print

Eins og margir hafa tekið eftir standa nú yfir miklar framkvæmdir í húsnæði bókasafnsins í ráðhúsinu á Selfossi en stefnt er á opnun bókasafnins í kringum 10. október nk. Markmið með þeim breytingum sem nú standa yfir er tvíþætt. Í fyrsta lagi er hlutverk bókasafnsins útvíkkað og aukið mikilvægi þess sem hluti hringiðu samfélagsins í Árborg, með því að samþætta þar bókasafnið við móttöku sveitarfélagsins og þjónustuborð. Hinsvegar er verið að leggja á nýtt gólfefni, en langt er síðan sú ákvörðun var tekin og tækifærið nýtt um leið til að gera nauðsynlegar breytingar.

Sveitarfélagið telur bókasafnið hafa mikilvægu hlutverki að gegna sem staður þar sem íbúar geta fundið sig velkomna, hitt hver annan og sinnt hugans málefnum. Til að auka enn frekar á þetta mikilvægi og tengja þjónustu sveitarfélagsins betur við íbúana og þarfir þeirra hefur verið ákveðið að flytja þjónustumóttöku ráðhússins niður af 2. hæð og finna henni stað í austurhluta 1. hæðarinnar. Breytingunum er hagað þannig að sem allra minnst þrengi að því rými sem safnið hefur haft.

Samráð hefur verið haft við starfsfólk um þessar breytingar allt frá því um síðustu áramót. Ólík sjónarmið hafa verið rædd af fjölda starfsfólks og niðurstöðum náð á grundvelli þess, í samvinnu við færustu arkitekta. Alltaf er það þó þannig að breytingar valda raski og ónæði bæði fyrir starfsfólk og íbúa og eðlilegt að sitt sýnist hverjum þar til reynsla er komin á.

Þegar þjónustumóttakan hefur tekið til starfa á 1. hæð mun taka við áframhaldandi þróun þar sem lögð verður áhersla á að mæta þörfum íbúa í ljósi reynslunnar og á þeim breyttu forsendum sem nútíminn hefur lagt að fótum okkur. Einnig stefnir Héraðsskjalasafn Árnesinga að því að flytja úr húsnæðinu að Austurvegi 2 og þá mun skapast meira rými fyrir bókasafnið og þjónustu sveitarfélagsins á 1. hæðinni.