Bæjarstjórn Árborgar samþykkir nýjar reglur um heimgreiðslur til foreldra
Bæjarstjórn Sveitarfélagsins Árborgar samþykkti á fundi sínum 25. mars sl. nýjar reglur um heimgreiðslur til foreldra barna á aldrinum 12 – 30 mánaða. Reglurnar taka gildi 1. apríl 2026 og frá þriðjudeginum 14.apríl verður hægt að sækja um í gegnum heimasíðu Árborgar.
Markmið heimgreiðslna er að auka valmöguleika og úrræði foreldra milli fæðingarorlofs og leikskólagöngu, og styðja þannig foreldra í umönnun barna sem ekki eru komin með leikskólapláss eða vistun hjá dagforeldri.
Helstu atriði nýju reglnanna:
-
Upphæð heimgreiðslna er kr.110.000- og greiðist eftirá, í fyrstu viku næsta mánaðar. Greiðslurnar teljast skattfrjálsar styrkgreiðslur
-
Heimgreiðslur eru greiddar í allt að 11 mánuði á ári, að undanskildum júlímánuði
-
Skilyrði eru m.a. að foreldrar og barn hafi sama lögheimili í Árborg, að barnið sé með gilda umsókn á leikskóla og að sveitarfélagið niðurgreiði ekki annars staðar fyrir viðkomandi barn
-
Umsóknir skulu berast rafrænt í síðasta lagi 20. dag mánaðar
-
Greiðslur eru ekki afturvirkar, og falla niður þegar barn fær pláss hjá dagforeldri eða leikskóla eða ef fjölskyldan flytur úr sveitarfélaginu
-
Sveitarfélagið áskilur sér rétt til endurgreiðslukröfu ef upp koma ofgreiðslur, t.d. vegna rangra upplýsinga eða ef ekki er tilkynnt um breytingar á högum
Stuðningur við ungar fjölskyldur
Með nýjum reglum um heimgreiðslur eflir Sveitarfélagið Árborg stuðningskerfi sitt við ungar fjölskyldur og eykur sveigjanleika foreldra á fyrstu árum barnsins. Reglurnar miða að því að tryggja jafnræði, gegnsæi og skilvirk vinnubrögð í þjónustu sveitarfélagsins.
