Betri Árborg – tækifæri til aukins samráðs við íbúa
Samráðsvettvangurinn „Betri Árborg“ sem er hluti af stafrænni þróun sveitarfélaga á Íslandi hefur opnað undir vefsíðunni „Betri Árborg“.
Betri Árborg er ætlað að vera vettvangur fyrir samráð íbúa og bæjarfyrirvalda um ýmis málefni í sveitarfélaginu. Markmiðið er að skapa vettvang til að auka þátttöku íbúa og tækifæri þeirra til að koma sínum hugmyndum á framfæri. Áhugasamir geta því með einföldum hætti, komið sinni ábendingu á framfæri og/eða tekið undir aðra um þau málefni sem eru til umræðu hverju sinni inn á Betri Árborg.
Allar ábendingar og hugmyndir sem koma inn undir Betri Árborg fá viðeigandi farveg sem er útskýrður nánar undir hverju verkefni.
Þau málefni sem eru opin í dag inn á Betri Árborg eru eftirfarandi:
Nafn á nýja brú yfir Ölfusá
Sveitarfélagið Árborg í samráði við Vegagerðina óskar eftir hugmyndum frá íbúum og öðrum áhugasömum um nafn á nýju brúnna yfir Ölfusá. Framkvæmdir við brúnna ganga vel en fyrirhugað er að hún opni árið 2028. Hér inn á Betri Árborg geta áhugasamir komið sínum hugmyndum á framfæri með einföldum hætti.
Opið er fyrir hugmyndir til 31.mars 2026. Bæjarráð Árborgar og fulltrúi Vegagerðar munu síðan vinna úr tillögum og leggja til afgreiðslu bæjarstjórnar Árborgar.
Heiti hringtorga innan þéttbýlis Selfoss
Sveitarfélagið Árborg óskar eftir hugmyndum frá íbúum um nöfn á fjögur hringtorg innan þéttbýlis Selfoss. Um er að ræða eftirfarandi hringtorg:
- Norðurhólar / Suðurhólar / Björkurstekkur
- Suðurhólar / Jórvík / Hólastekkur
- Eyrabakkavegur / Hólastekkur / Víkurheiði
- Austurvegur / Gaulverjabæjarvegur
Hér inn á Betri Árborg geta áhugasöm lagt fram hugmyndir undir hverju hringtorgi með einföldum hætti.
Opið er fyrir hugmyndir til 31.mars 2026. Skipulagsnefnd Árborgar mun vinna úr öllum tillögum og leggja till afgreiðslu bæjarstjórnar ásamt því að kynna á vefsíðu sveitarfélagsins.
