Erindi um hagnýtt íslenskunámskeið á Menntakviku
Erindi á Menntakviku 2022 um hagnýtt íslenskunámskeið fyrir foreldra barna með fjölmenningarlegan bakgrunn á grunnskólaaldri.
Aneta Figlarska, kennsluráðgjafi í fjölmenningu, Anna Linda Sigurðardóttir, deildarstjóri fjölmenningardeildar í Vallaskóla og Anna Katarzyna Wozniczka, verkefnastjóri í málefnum flóttamanna hjá Sveitarfélaginu Árborg stóðu að kynningu þann 7. október á Menntakviku, árlegri ráðstefnu í menntavísindum á Menntavísindasviði Háskóla Íslands.
Í erindinu var fjallað um rannsókn á ávinningum íslenskunámskeiðs fyrir foreldra barna með fjölmenningarlegan bakgrunn á grunnskólaaldri sem haldið var haustið 2021.
Um var að ræða þróunarverkefni hjá Fjölskyldusviði Árborgar styrkt af Íslenskusjóðnum Háskóla Íslands. Rannsóknir sýna að tungumálaörðugleikar geta hindrað þátttöku foreldra í námi barna sinna og þeir geta upplifað sig einangraða. Aðalnámskrá grunnskóla gerir ráð fyrir að foreldrar séu virkir þátttakendur í skólasamfélaginu í samvinnu við starfsmenn skóla. Veturinn 2021/22 voru 13% grunnskólanema í Árborg með fjölmenningarlegan bakgrunn.
Tilgangur rannsóknarinnar var að skoða hvort og hvernig námskeiðið efldi notkun foreldranna á íslensku máli sem og þekkingu þeirra á íslensku skólakerfi.
12 foreldrar og 11 börn þeirra tóku þátt í námskeiðinu en boðið var upp á málörvun fyrir börn í samstarfi við Rauða krossinn. Kennt var tvö kvöld í viku í fimm vikur. Að kennslu stóðu deildarstjóri fjölmenningardeildar, kennsluráðgjafi í fjölmenningu og verkefnastjóri í málefnum flóttamanna hjá sveitarfélaginu. Safnað var skriflegum upplýsingum um íslenskukunnáttu foreldranna og viðhorf þeirra til námskeiðsins í upphafi og lok námskeiðsins. Einnig var stuðst við dagbækur og fundargerðir kennaranna.
Nemendahópurinn var fjölbreyttur hvað varðar bakgrunn og þarfir.
Niðurstöður bentu til þess að í lok námskeiðsins voru foreldrarnir betur upplýstir og sjálfstæðari, m.a. í foreldraviðtölum, skráningu barna í frístundir og við notkun Mentor-kerfisins. Námskeiðið var stutt en þátttakendurnir fengu engu að síður gott rými til tjáningar og spurninga.
Brýn þörf er fyrir námskeið af þessu tagi en það eykur hlutdeild foreldra í námi barna sinna, styrkir samstarf á milli heimilis og skóla og eflir tengslanet milli foreldra. Fyrirlesarar fengu góðar spurningar að kynningunni lokinni og jafnframt hvatningu til að deila reynslunni af námskeiðinu á víðari vettvangi.
Vert er að segja frá því að Fjölskyldusvið Árborgar fékk styrk frá Sprotasjóði til að halda námskeiðið aftur og nýtt íslenskunámskeið mun hefjast þann 19. október nk.
