Frístundaheimili Árborgar létu sköpunarkraftinn ráða för í Myndasöguverkefni
Frístundaheimili Árborgar tóku þátt í Barnamenningardögum Suðurlands með skapandi og skemmtilegu myndasöguverkefni sem endaði á glæsilegri sýningu í Sundhöllinni.
„Sum sögðu frá hetjum og ævintýrum, á meðan aðrir sóttu innblástur í daglegt líf og gerðu það að einstökum sögum“
Í verkefninu fengu börnin að láta ímyndunaraflið ráða ferð og búa til sínar eigin myndasögur. Þau sköpuðu áhugaverðar persónur, spennandi ævintýri og litrík sögusvið þar sem allt var mögulegt. Börnin lögðu mikla vinnu í verkefnið og má greinilega sjá hversu vandlega þau unnu að hverju smáatriði. Sum börnin teiknuðu persónur og sögur á meðan önnur hjálpuðu til við að lita. Samvinna, sköpunargleði og metnaður einkenndu vinnuna frá upphafi til enda.
Markmið verkefnisins var að efla sköpunargleði og sjálfstjáningu, hvetja börn til að segja sínar sögur, þróa færni í myndrænni tjáningu og frásögn.
Útkoman er fjölbreytt safn af myndasögum sem endurspeglar hugmyndaauðgi, gleði og sköpunarkraft barna á frístundaheimilum Árborgar.
Starfsfólk frístundaheimilanna er afar stolt af framlagi barnanna og þakkar þeim fyrir dugnaðinn og eljusemina. Það er ljóst að verkefnið hefur bæði styrkt samheldni hópsins og sýnt hversu mikið er hægt að skapa þegar mörg leggja hönd á plóg. Við erum mjög ánægð með að hafa fengið að taka þátt í Barnamenningardögum Suðurlands þar sem list og sköpun barna fékk að blómstra.
