Gengið frá kaupsamningi um sölu á landinu Björkurstykki 3
Sveitarfélagið Árborg hefur gengið frá kaupsamningi við Jórvík fasteignir ehf. vegna sölu á landinu Björkurstykki 3 á Selfossi. Um er að ræða sölu á landi undir íbúðarbyggð fyrir 1,2 milljarða.
Sveitarfélagið auglýsti í desember sl. til sölu landið Björkurstykki 3 sem er hluti af Stekkjarhverfinu á Selfossi. Um er að ræða 17,5 ha land sem ætlað er undir íbúðabyggð og kaupandi landsins myndi í framhaldinu sjá um deiliskipulagsgerð, hönnun, uppbyggingu innviða og sölu byggingarlóða.
Áhugasömum uppbyggingaraðilum bauðst að bjóða í landið og komu inn fjögur tilboð sem voru öll yfir lágmarksverðinu, 700 milljónir líkt og sjá má á myndinni hér að neðan.
Hæsta tilboðið kom frá Jórvík fasteignum ehf. upp á kr. 1.210.000.800 kr. eða 73% yfir lágmarksverðinu. Fyrirtækið hefur á undanförnum árum séð um sambærilega uppbyggingu íbúðahverfis í landinu Jórvík sem liggur að Björkurstykki 3.
Fulltrúar Sveitarfélagsins Árborgar og Jórvík fasteignar ehf. undirrituðu á dögunum kaupsamning til staðfestingar á sölunni. Það voru þau Sigríður Vilhjálmsdóttir, staðgengill bæjarstjóra, Bragi Bjarnason, formaður bæjarráðs og Aðalsteinn Jóhannsson frá Jórvík fasteignum sem skrifuðu undir samninginn.
“Þetta er góð sala fyrir Sveitarfélagið Árborg og hefur jákvæð áhrif á rekstur sveitarfélagsins. Um er að ræða spennandi uppbyggingarsvæði sem býður upp á möguleika til fjölbreyttrar íbúðabyggðar og verður ánægjulegt að sjá það byggjast upp á næstu árum" segir Bragi Bjarnason, formaður bæjarráðs Árborgar.
