Handóður heklari í Árborg
Þórey Ósk Arnarsdóttir, íbúi í Árborg er sannkallaður heklmeistari og á heiðurinn af handverki sem er til sýnis í glugga Bókasafns Árborgar á Selfossi um þessar mundir.
Í tilefni af Handverk & Huggulegheit, handverksgleði á Bókasafni Árborgar Selfossi laugardaginn 21. mars kl. 15, þá hefur starfsfólk bókasafnsins skreytt útstillingarglugga safnsins með hekluðum gripum eftir Þóreyju Ósk.
Þórey er 26 ára gömul og hefur alltaf haft gaman að list og hefur teiknað og föndrað frá því að hún man eftir sér.
Eftir að hún kynntist heklinu hjá vinkonu sinni fyrir fjórum árum þá hefur það orðið eitt af hennar helstu áhugamálum en það sameinar hjá henni ró, þolinmæði og gleðina við að skapa eitthvað mjúkt og krúttlegt sem lifnar svo við í höndunum á henni.
Við hvetjum íbúa til að kíkja á verk Þóreyjar á bókasafninu og auðvitað til þess að mæta í handverksgleðina á laugardaginn.
