Hulduheimar fögnuðu 20 ára afmæli með glæsilegri afmælisviku
Leikskólinn Hulduheimar fagnaði 20 ára afmæli þann 14. nóvember 2026 og börnin tóku virkan þátt í undirbúningnum.
Í aðdraganda afmælisins ræddu börnin á deildunum hvað þau vildu gera í tilefni tímamótanna. Hugmyndirnar voru fjölbreyttar; kökubakstur, tónlist, dans, skemmtiatriði, búningar og góður matur voru meðal þess sem stóð efst á óskalistanum.
Til að koma til móts við sem flestar hugmyndir var ákveðið að halda sérstaka afmælisviku með uppákomum alla daga. Börnin tóku virkan þátt í undirbúningnum og skreyttu deildirnar sínar fyrir hátíðina.
Fjölbreytt dagskrá alla vikuna
Afmælisvikan hófst miðvikudaginn 11. nóvember með dótadegi og kökubakstri hjá elstu börnunum. Daginn eftir var búninga- og náttfatadagur auk þess sem slegið var upp balli í salnum.
Á föstudeginum nutu börnin brúðuleiksýningar frá Bernd Ogrodnik og fengu pizzu í hádeginu. Á mánudeginum var flæði um allt húsið þar sem börnin gátu farið frjálst á milli deilda og síðar um daginn var boðið upp á afmælisköku sem elstu börnin höfðu bakað.
Fjölmennt opið hús
Afmælisvikunni lauk með opnu húsi þriðjudaginn 17. nóvember. Þar komu saman fjölskyldur leikskólabarnanna, fyrrverandi nemendur og starfsfólk, Bragi bæjarstjóri og fulltrúar bæjarstjórnar, Heiða Ösp sviðsstjóri fjölskyldusviðs og fulltrúar skólaþjónustu, stjórnendur annarra leikskóla í Árborg, nemendur úr Sunnulækjarskóla og leikskólanum Álfheimum, fyrrverandi leikskólastjóri Hulduheima, mannauðsstjórar og fleiri góðir gestir.
ART-vottun og ný námskrá
ART-teymi Suðurlands kom einnig í heimsókn og veitti Hulduheimum ART-vottun. Jafnframt var ný námskrá leikskólans kynnt formlega fyrir foreldrum og starfsfólki með tölvupósti og er hún nú aðgengileg á vefsíðu Hulduheima.
Tímamót sem heppnuðust vel
Óhætt er að segja að afmælishátíðin hafi tekist afar vel. Hulduheimar halda áfram að dafna með öllu því góða fólki sem saman myndar öflugt leikskólasamfélag.


