Nýr þjónustusamningur milli Svf. Árborgar og Skátafélagsins Fossbúa
Undirritaður hefur verið nýr þjónustusamningur við Skátafélagið Fossbúa um starfsemi félagsins fyrir íbúa á svæðinu. Um er að ræða fimm ára samning sem styður við starfsemi og uppbyggingu félagsins á næstu árum.
Það voru Bragi Bjarnason, bæjarstjóri og Thelma K. Kvaran, félagsforingi sem undirrituðu samninginn sem gildir út árið 2030.
Skátafélagið fær greiðslur fyrir barna- og ungmennastarf félagsins ásamt því að taka að sér verkefni í tengslum við Sumardaginn fyrsta, 17.júní, fjölskyldugöngu og fjölskylduvöku. Ásamt því mun félagið vera í góðu samstarfi við sveitarfélagið í tengslum við verkefni farsældar barna og samþættingu mála sem snúa að börnum og fjölskyldum.
Uppbygging á nýju svæði
Sveitarfélagið Árborg og skátafélagið hafa í sameiningu unnið að uppbyggingu nýs skátasvæðis á Selfossi og er nú búið að staðfesta nýtt deiliskipulag á grænu svæði við Sunnulækjarskóla. Skátafélagið mun fá svæðið til uppbyggingar á starfsemi félagsins ásamt því að svæðið verður opið íbúum til afþreyingar og útivistar.
Strax á þessu ári verður byggð upp félagsaðstaða fyrir skátastarfið og í framhaldinu útisvæðið á næstu árum. Sjá má hugmyndavinnu umhverfisdeildar og skátafélagsins á meðfylgjandi mynd af möguleikunum á svæðinu og einnig mynd af deiliskipulaginu.
Markmiðið er að skapa gott útivistarsvæði sem nýtist skátastarfinu, skólum og íbúum til framtíðar.
