Nýtt fyrirkomulag Hverfisráða í Árborg
Bæjarstjórn Árborgar hefur samþykkt nýtt fyrirkomulag fyrir Hverfisráð í Árborg. Ráðin verða þrjú talsins, á Eyrarbakka, Stokkseyri og í Gamla Sandvíkurhreppi.
Á fundi bæjarstjórnar Árborgar 4. febrúar sl. var samþykkt endurskoðað fyrirkomulag fyrir hverfisráð í Sveitarfélaginu Árborg.
Árið 2021 var ráðgjafafyrirtækið RR ráðgjöf fengið til að endurskoða samþykktir um hverfisráðin og skilaði það af sér tillögum haustið 2021. Ekki hafði verið unnið frekar með þær tillögur og frá árinu 2022 hefur ekki verið skipað í hverfisráð innan Árborgar.
Í nýjum samþykktum fyrir hverfisráð í Árborg var m.a. tekið mið af tillögum RR ráðgjafar og breytinga í stafrænni þjónustu sveitarfélagsins.
Ein helsta breytingin er að gert er ráð fyrir að hverfisráð sé starfandi í byggðarkjörnum sveitarfélagsins þar sem íbúafjöldi er færri en 1.000 einstaklingar. Hverfisráðin verða því þrjú talsins og starfa á Eyrarbakka, Stokkseyri og í gamla Sandvíkurhrepp. Bæjarráð Árborgar getur þó lagt til fjölgun hverfisráða komi fram ósk um slíkt frá öðrum þéttbýliskjörnum sveitarfélagsins.
Helstu markmið hverfisráða eru að vera umræðuvettvangur og styrkja samráð íbúa, félagasamtaka og atvinnulífs við sveitarfélagið. Einnig að vera tengiliður íbúa við stjórnkerfi sveitarfélagsins, koma sjónarmiðum, þörfum og hagsmunum hverfisins á framfæri við sveitarfélagið.
Hverfisráðin verða skipuð þremur fulltrúum kosnum til tveggja ára í senn á aðalfundi viðkomandi hverfisráðs, ásamt þremur varamönnum. Einn af fulltrúunum er kjörinn formaður en aðrir skipta með sér verkefnum varaformanns og ritara. Tveir bæjarfulltrúar vinna síðan með viðkomandi hverfisráði, mæta á fundi og sjá um fundarritun.
Áætlað er að boðað verði til aðalfundar í nýjum hverfisráðum í mars 2026. Sveitarfélagið Árborg mun sjá um að boða til fyrsta aðalfundar. Áhugasamir geta bæði sent tilnefningar og/eða framboð til hverfisráðs í sínu hverfi á Rósu Sif Jónsdóttur, ritara bæjarstjóra, rosa@arborg.is eða boðið sig fram á aðalfundi.
Það er von sveitarfélagsins að með hverfisráðunum aukist samráð íbúa og stjórnkerfisins enn frekar með það að leiðarljósi að bæta samfélagið okkar.
Fylgiskjöl: Samþykktir fyrir Hverfisráð
