Oceanus „Stórsjór“ fer fram í fimmta sinn á Eyrarbakka
35 alþjóðlegir listamenn taka þátt í listamannadvöl og
sýningarhátíð.
Dagana 15. maí–15. júní 2026 fer fimmta útgáfa Oceanus „Stórsjór“ fram á Eyrarbakka. Um 35 listamenn frá ólíkum heimshornum koma saman í sjávarþorpinu til að taka þátt í mánaðarlangri listamannadvöl sem lýkur
með sýningum, gjörningum, tónlistarviðburðum, opnum vinnustofum og fjölbreyttri dagskrá fyrir almenning.
Á aðeins fimm árum hefur Oceanus fest sig í sessi sem einstakur vettvangur fyrir samtímalist á Íslandi. Hátíðin er listamannarekið frumkvæði sem byggir á samveru, samstarfi og tengingu við staðinn. Á hverju ári umbreytist Eyrarbakki í lifandi samfélag listamanna þar sem ný verk, samtöl og vináttubönd verða til í nánu sambandi við sögu þorpsins, náttúru þess og íbúa.
„Eyrarbakki er minn jarðvegur – þar næ ég tengingu við rætur mínar og næ að næra þær til að vaxa og dafna. Stærsti draumurinn var þó alltaf að skapa jarðveg til listsköpunar fyrir fleiri en mig sjálfa; að deila þessum sögufræga og töfrandi stað með öðrum, vinna með samfélaginu og skapa vettvang þar sem fólk getur hist, lært hvert af öðru og byggt upp tengsl. Krafturinn sem myndast þegar fólk vinnur saman í sköpun og kærleik er ótrúlegur,“ segir Ásta Vilhelmína Guðmundsdóttir, stofnandi og listrænn stjórnandi Oceanus.
Oceanus hófst árið 2022 í samstarfi við Byggðasafn Árnesinga og hefur síðan vaxið sjálfstætt ár frá ári. Þátttakendur koma úr öllum geirum listanna, þar á meðal myndlist, ljósmyndun, vídeólist, tónlist, dansi, sviðslistum, gjörningalist og textíl. Á meðan á dvölinni stendur vinna listamennirnir saman, deila reynslu og þróa ný verkefni sem verða fyrir áhrifum af umhverfi, sögu, fólki og hver öðrum.
Sérstaða Oceanus felst í því að hátíðin er byggð á raunverulegum kynnum og gagnkvæmum áhrifum. Á Eyrarbakka myndast tímabundið samfélag þar sem listamenn og heimafólk deila tíma, samtölum, þekkingu og reynslu. Listamennirnir sækja innblástur í sögu staðarins, náttúruna, fólkið og hversdagslífið, á meðan íbúar og gestir fá innsýn í listrænt ferli sem er enn í mótun. Þannig verður til vettvangur þar sem listsköpun, samfélag og staður hafa áhrif hvert á annað.
Í tilefni af fimm ára afmæli Oceanus kemur jafnframt út ný bók sem rekur sögu verkefnisins frá upphafi. Bókin er um 100 blaðsíðna safn ljósmynda, sagna og hugleiðinga sem fangar andrúmsloft hátíðarinnar og þau tengsl sem hafa myndast í gegnum árin. Þar er fjallað um listaverkin, fólkið, samtölin og samfélagið sem hefur vaxið í kringum verkefnið og mótað það frá fyrstu hátíðinni. Bókin verður kynnt samhliða hátíðinni og er nú fáanleg í forsölu. Allur ágóði af útgáfunni rennur til að standa straum af prent- og hönnunarkostnaði og stuðlar að því að varðveita sögu verkefnisins til framtíðar.
Heiti hátíðarinnar í ár, „Stórsjór“, vísar til ölduhæðar sjávar og er jafnframt myndlíking fyrir þá krafta sem verða til þegar fólk kemur saman til að skapa, deila reynslu og mynda ný tengsl. Á tímum þar sem menningarsamskipti og samvera skipta sífellt meira máli stendur Oceanus sem áminning um mikilvægi listamannarekinna verkefna og þeirra samfélaga sem gera þau möguleg.
Opnunarhátíð Oceanus „Stórsjór“ fer fram á Eyrarbakka 13. júní kl. 13–18.
Sýningarhelgar 13. & 14. júní og 20. & 21. júní kl. 13–18. Nánari upplýsingar um þátttakendur, dagskrá og bókaútgáfu má finna á www.oceanushafsjor.com.
Fyrirspurnir fjölmiðla og beiðnir um viðtöl:
Ásta Vilhelmína Guðmundsdóttir
asta@astaclothes.is
Instagram /oceanus__hafsjor/
Facebook /Hafsjor-Oceanus/
