Tilkynning frá Sveitarfélaginu Árborg
Miðvikudaginn 30. júní voru kveðnir upp úrskurðir mennta- og menningarmálaráðuneytisins sem varða málefni tiltekinna barna í skólahverfi Stekkjaskóla.
Niðurstaða ráðuneytisins er að það teljist stjórnvaldsákvörðun að flytja þessi börn milli skóla vegna breyttra skólahverfa. Því beri sveitarfélaginu að fara að ákvæðum stjórnsýslulaga við þá tilfærslu en í því felst m.a. að tilkynna um fyrirhugaða ákvörðun og veita andmælarétt. Ráðuneytið viðurkennir hinsvegar heimild sveitarfélagsins til að setja stjórnvaldsfyrirmæli um skólahverfi og því verða nemendur í 1. bekk Stekkjaskóla ekki fyrir áhrifum vegna úrskurðar ráðuneytisins.
Foreldrar barna í 2. - 4. bekk sem fengu tilkynningu um flutning barns úr fyrri skóla yfir í Stekkjaskóla munu fá sérstakt bréf í framhaldi ofangreinds úrskurðar mennta- og menningarmálaráðuneytis. Þar verður þeim gefinn kostur á koma sjónarmiðum sínum og andmælum að, áður en endanleg ákvörðun verður tekin um flutning barns þeirra.
Samráð er haft við Samband íslenskra sveitarfélaga og verður óskað eftir fundi með mennta- og menningarmálaráðuneytinu til að fara yfir úrskurðinn og málefni Stekkjaskóla. Líkt og upplýst var um í svörum Sveitarfélags Árborgar til ráðuneytisins vegna málsins eru engin merki um annað en að í haust verði til staðar fullbúið skólahúsnæði Stekkjaskóla sem mætir þeim kröfum sem gerðar eru til slíks húsnæðis.
Sveitarfélagið Árborg biðst velvirðingar á þeirri stöðu sem upp er komin vegna þessa.