Vetrartónar 2026 í Stokkseyrarkirkju
Tónleikaröðin Vetrartónar í Stokkseyrarkirkju sem hóf göngu sína í fyrra snýr aftur með glæsilega dagskrá. Að þessu sinni verða tónleikarnir fernir og fara fram fjögur miðvikudagskvöld í röð.
Tónleikaröðin er liður í starfi Stokkseyrarkirkju að bjóða fólk velkomið til kirkju og njóta vandaðs tónlistarflutnings á dimmasta tíma ársins. Allir tónleikarnir hefjast klukkan 20:30 og er aðgangur ókeypis, en gestum gefst kostur á að leggja til frjáls framlög. Tónleikaröðin er styrkt af Uppbyggingarsjóði Suðurlands.
Dagskrá Vetrartóna 2026
· 11. febrúar – Óperur og óratoríur: Stórsöngkonan Sigríður Ósk Kristjánsdóttir mezzó-sópran og Tómas Eggert Guðnason píanó- og orgelleikari flytja söngdagskrá helguð þekktum óratoríu- og óperuaríum.
· 18. febrúar – Íslensk og þýsk sönglög: Sunnlenski barítóninn Gunnlaugur Bjarnason og Sævar Helgi Jóhannsson píanóleikari flytja sönglög eftir Sigvalda Kaldalóns, Jón Þórarinsson, L.v. Beethoven, Pál Ísólfsson o.fl.
· 25. febrúar – Skálholtsbiskup og Sturlungar: Hinn margrómaði miðaldatónlistarhópur Voces Thules, sem starfað hefur frá árinu 1991, flytur brot úr tíðarsöng Þorláks helga og söngva um draumfarir Sturlunga við eigin hljóðfæraundirleik þar sem leikið verður á langspil, symfón, gíttern, flautur, sekkjapípur, trommur og slagverk af ýmsum gerðum.
· 4. mars – Þjóðlög, dægurlög og kvæðaskapur: Hin ástsæla söngkona Ragnheiður Gröndal og Guðmundur Pétursson gítarleikari flytja vel valin þjóðlög og dægurlög innan um nýjan og fornan kvæðaskap.
