2. fundur menningarnefndar
2. fundur menningarnefndar Árborgar, kjörtímabilið 2010-2014 haldinn mánudaginn 13. september 2010 í Setri Egils, Ráðhúsi Árborgar, Austurvegi 2, Selfossi, kl. 07:30
Mætt:
Kjartan Björnsson, formaður, D-lista,
Björn Ingi Bjarnason, nefndarmaður, D-lista,
Kjartan Ólason, nefndarmaður, S-lista,
Andrés Sigurvinsson, verkefnisstjóri íþrótta-, forvarna- og menningarmála,
Bragi Bjarnason, íþrótta- og tómstundafulltrúi sat, einnig hluta fundarins. Kjartan Björnsson, formaður, þurfti að yfirgefa fundinn 10:27 og hafði hann símleiðis samband við varamann sinn sem ætlar að reyna að koma. Björn Ingi Bjarnason, varaformaður tekur við stjórn fundarins.
Dagskrá:
1. 1009140 - Fundir í MÁ haust 2010
Fyrirspurn frá Kjartani Ólasyni, fulltrúa S-lista : ,,Hvers vegna var fyrirhugaður fundur nefndarinnar 6. september kl. 18:00 sl. ekki haldinn?” Formaður svaraði eftirfarandi: ,,Andrés, verkefnisstjóri kom úr fríi 6. september og því var það misráðið hjá okkur í júlí að boða til fundar sama dag og hann kom úr fríi.”
Bókun frá Kjartani Ólasyni, fulltrúa S-lista: ,,Óhjákvæmilegt er að gera alvarlega athugasemd við skort á formfestu í fundarskipulagi þessarar nefndar. Eins og fram kom í fundargerð seinasta fundar þessarar nefndar var hann ráðgerður mánudaginn 6. september kl. 18:00. Engin formleg tilkynning barst nefndarmönnum um niðurfellingu þessa fundar. Hins vegar er svo skotið á fundi hér í morgunsárið kl. 7:30. Hafi ástæða þessarar ringulreiðar í störfum nefndarinnar verið sú að aðalmenn hafi ekki getað mætt til fundar á áður ráðgerðum fundartíma, hví voru þá ekki varamenn kvaddir til fundasetu á þessum fyrirfram ákveðna fundartíma? Við þessari fyrirspurn er hér með óskað svars. Þar sem líkur benda til að gengið hafi verið á svið við stjórnsýslulög í framkvæmd seinasta fundar lista- og menningarnefndarinnar, og síðan bætist við fyrrnefndi losarabragur verður að gera ríka kröfu til þess, að fundir verði haldnir á fyrirfram ákveðnum tíma, við það verði staðið og stjórnsýslulögin haldin.”
Fulltrúar D-lista bóka: ,,Fulltrúar D-lista menningarnefndar mótmæla því að stjórnsýslulög hafi verið brotin á síðasta fundi lista- og menningarnefndar. Engin ringulreið ríki í störfum nefndarinnar, starfsmaður nefndarinnar var beðinn um að senda út til nefndarmanna upplýsingar um breyttan fundardag og fundartíma þegar hann kom aftur til vinnu úr fríi sem hann og gerði.
2. 1006067 - Skipulagsbreytingar 2010
Kjartan Ólason, fulltrúi S-lista, leggur fram eftirfarandi greinargerð og fyrirspurnir: Hinn 5.7.2010 lagði ég eftirfarandi fyrirspurn fram á fyrsta fundi lista- og menningarnefndar, fyrirspurnin var 10. mál -1006067- í fundargerð :
Kjartan Ólason, fulltrúi S- lista leggur fram eftirfarandi fyrirspurn: ,, Nú þegar staða verkefnisstjóra íþrótta-, forvarna- og menningarmála hefur verið lögð niður, hvaða starfsmaður sveitarfélagsins mun þá sinna þessum verkefnum? Og hver var ástæða þess að starfið var lagt niður? Í ljósi síendurtekinna yfirlýsinga sjálfstæðismanna um samráð og samstarf varðandi mikilvægar ákvarðanir, þá vaknar af þessu tilefni eftirfarandi spurning: Við hverja var haft samráð eða samstarf þegar ákvörðunin var tekin um að leggja niður starf verkefnisstjóra íþrótta-, forvarna- og menningarmála? Eða tók oddviti sjálfstæðismanna ákvörðunina einn?” Fulltrúar D-lista vísa fyrirspurninni frá þar sem henni er ekki beint til LMÁ. Bókun fulltrúa S-lista: Fulltrúi S-lista mótmælir þessari málsmeðferð, telur sig eiga rétt á að fá fyrirspurninni svarað af Bæjarstjórn Árborgar. Ástæðan er sú að um vinnulag í nefndinni er að ræða.
Á 4. fundi bæjarráðs Árborgar 22.júlí 2010, þegar viðkomandi fundargerð var staðfest, lagði Ragnheiður Hergeirsdóttir, S-lista, fram svohljóðandi fyrirspurn um þetta sama mál:
"Voru fulltrúar Sjálfstæðisflokksins í LMÁ hafðir með í ráðum þegar tekin var ákvörðun um að leggja niður starf verkefnisstjóra íþrótta-, forvarna- og menningarmála?" Enn fremur lagði hún fram svohljóðandi bókun á sama fundi : "Fulltrúi Samfylkingarinnar fer fram á lögfræðilagt mat á réttmæti afgreiðslu meirihluta LMÁ á fyrirspurnum frá Kjartani Ólasyni á fundi LMÁ þann 5. júlí s.l. Matið óskast skriflega lagt fram fyrir næsta fund bæjarráðs"
Á 5. fundi bæjarráðs Árborgar, 5. ágúst 2010, er 9. mál fundarins 1006067 "Minnisblað bæjarritara vegna fyrirspurnar fulltrúa S- lista á fundi lista- og menningarnefndar hinn 5. júlí sl . Minnisblað lagt fram". Hér virðist svar við bókun og tillögu Ragnheiðar Hergeirsdóttur frá fundinum áður vera komið fram. En hvers vegna í ósköpunum kemur efni minnisblaðsins ekki fram í bókun bæjarráðsins? Er efni þess svo viðkvæmt fyrir hörundssæri formanns ráðsins? Þolir hann ekki að lögfræðiálit bæjarritarans komi fram í fundargögnum bæjarráðsins?
Í framhaldi af framantöldu legg ég fram eftirfarandi fyrirspurnir varðandi þetta mál:
a) Hvers vegna lætur formaður menningarnefndar, Kjartan Björnsson, undir höfuð leggjast að taka þetta mál hér inn á dagskrá fundarins þegar, að því er virðist, lögfræðilegt álit liggur fyrir á því hvernig meirihluti nefndarinnar svaraði réttmætri fyrirspurn um þetta grundvallaratriði á síðasta fundi? Hér með er þess krafist að hann leggi þessi gögn fram til umfjöllunar hér í nefndinni undanbragðalaust.
b) Fyrirspurn til bæjarstjórnar Árborgar: Nú þegar staða verkefnisstjóra íþrótta-, forvarna- og menningarmála hefur verið lögð niður, hvaða starfsmaður sveitarfélagsins mun þá sinna þessum verkefnum? Og hver var ástæða þess að starfið var lagt niður? Í ljósi síendurtekinna yfirlýsinga sjálfstæðismanna um samráð og samstarf varðandi mikilvægar ákvarðanir, þá vaknar af þessu tilefni eftirfarandi spurning: Við hverja var haft samráð eða samstarf þegar ákvörðunin var tekin um að leggja niður starf verkefnisstjóra íþrótta-, forvarna- og menningarmála? Eða tók oddviti sjálfstæðismanna ákvörðunina einn? Komu fulltrúar meirihluta LMÁ að þessari ákvörðun?
Formaður fór fram á fundarhlé kl. 08:21. Fundur settur aftur 8:30. Bókun fulltrúa D-lista varðandi fyrirspurnir: a) Umbeðin gögn lögð fram á fundinum, erindið var afgreitt í bæjarstjórn og því ekki ástæða til að taka málið til afgreiðslu. Minnisblað bæjarritara frá 29. júlí 2010 er eftirfarandi:
Selfossi, 29. júlí 2010
1006067
Varðar: fyrirspurn fulltrúa S-lista á fundi lista- og menningarnefndar
Á 4. fundi bæjarráðs óskaði bæjarfulltrú Samfylkingarinnar eftir að fengið yrði lögfræðilegt mat á réttmæti afgreiðslu meirihluta LMÁ á fyrirspurnum frá Kjartani Ólasyni á fundi LMÁ þann 5. júlí sl.
Á dagskrá fundar lista- og menningarnefndar hinn 5. júlí sl. var fyrirspurn frá fulltrúa S-lista í nefndinni. Dagskrá fundarins fylgdi skrifleg fyrirspurn sem hafði yfirskriftina "Fyrirspurn til bæjarstjórnar Árborgar:" Afgreiðsla nefndarinnar var sú að vísa fyrirspurninni frá þar sem henni var ekki beint til nefndarinnar. Með hliðsjón af meginreglum stjórnsýsluréttar hefði verið eðlilegra að nefndin hefði vísað fyrirspurninni til bæjarstjórnar, enda má lesa út úr stjórnsýslulögum þá meginreglu að stjórnvöldum beri að leitast við að koma erindum sem þeim berast til réttra viðtakenda.
Rétt er að taka fram að við frágang fundargerðarinnar féll yfirskrift fyrirspurnarinnar út og kom því ekki fram í fundargerð þeirri sem fylgdi fundarboði bæjarráðs og í endurriti á heimasíðu sveitarfélagsins. Bætt hefur verið úr þessu.
b) Fyrirspurninni er beint til bæjarstjórnar og verður því ekki afgreidd á þessum vettvangi.
Bókun Kjartans Ólasonar, fulltrúa S-lista:
,,Bókun í tilefni bókunar bæjarfulltrúa D-lista á fundi bæjarráðs Árborgar 5. ágúst sl. er minnisblað bæjarritara var lagt fram, sem var í raun lögfræðiálit um að fulltrúum D-lista hefði borið samkvæmt stjórnsýslulögum að hlutast til um svar við fyrirspurn fulltrúa S-lista á fundi lista- og menningarnefndar hinn 5. júlí sl.:
Eitthvað hefur þessi niðurstaða komið við kaun hjá formanni bæjarráðsins því hann leynir óþægilegri niðurstöðu minnisblaðsins en vitaskuld bar honum sem formanni að sjá um að aðalefni þess kæmi til bókunar í fundargerð frá þessum fundi.
Þess í stað sendir hann skeyti út í bæjarkerfið og leiðbeiningar um vinnubrögð á nefndasviði sveitarfélagsins. Hann hefur að auki fengið forseta bæjarstjórnarinnar til liðsinnis við að semja þennan samsetning því að þessi boðskapur er í nafni beggja þessara vellaunuðu bæjarfulltrúa.
Vissulega hefur margur ofmetnast af minna tilefni en því að státa af svokölluðum hreinum meirihluta jafnvel þótt hann hvíli einungis á röskum þriðjungi kosningabærra manna í sveitarfélaginu. Sagan greinir líka mörg dæmi þess að þau systkin, dramb og hroki, eru þá gjarnan á næsta leiti. Og menn brestur stundum dómgreind í valdavímunni. Sú virðist því miður hafa orðið raunin hér í þessu tilfelli. Enda mun fyrrnefndur boðskapur að engu hafður en hins vegar enn minnt á mikilvægi þess að stjórnsýslulög verði í heiðri höfð. “Formaður tók fundarhlé 8:40. Fundur settur aftur 8:44.
Bókun fulltrúa D-lista í menningarnefnd: ,,Störfum eftir bestu samvisku, báðir með allnokkra reynslu af menningar- og félagsstörfum. Okkar megináhugi liggur á sviði menningarmála. Fulltrúar D-lista í menningarnefnd taka ekki þátt í pólitískum samkvæmisleikjum sem þessum.”
Bókun fulltrúa S- lista: ,,Það hvaða mál eru réttmæt fundarefni á fundum þessarar virðulegu nefndar, ef það er túlkun fulltrúa D-lista að það séu pólitískir samkvæmisleikir þá er það skoðun mín að þar séu þeir á rangri braut og ekkert annað en um útúrsnúning að ræða.”
3. 1007014 - Þátttaka lista- og menningarnefndar í kynningum viðburða í sveitarfélaginu
Fyrirspurnir frá Kjartani Ólasyni, fulltrúa S- lista, til meirihluta nefndarinnar:
,,a) Hvað hefur verið auglýst fyrir mikið fé það sem af er? b) Hvar hefur verið auglýst? c) Hvaða viðburðir hafa verið auglýstir og fyrir hve mikið hver? d) Hver hefur tekið ákvarðanir um hvaða viðburðir eru auglýstir og hve mikið? e) Hvaða starfsmaður sveitarfélagsins hefur séð um þessa vinnu? f) Hvað er áætlað að mikið fé renni til lista- og menningarnefndar í framtíðinni vegna þessa og eftir hvaða regluverki er unnið við úthlutun þessara fjármuna ? g) Eru til fjárheimildir fyrir þessi verkefni samkvæmt samþykktri fjárhagsáætlun?”
Verkefnisstjóri vísaði í útsend fundargögn og gerði grein fyrir eftirfarandi: a) Útlagður kostnaður vegna auglýsinga menningarviðburða er í dag kr. 108.068 kr. b) Hjá RÚV, c)Eins og kom fram á síðast fundi nefndarinnar var ákveðið að styðja við opinberar hátíðir í sveitarfélaginu. Frá því að verkefnið var hafið hafa eftirtaldar hátíðir hlotið stuðning: Bryggjuhátíðin Stokkseyri kr. 24.424, Færeyskir dagar - Stokkseyri kr. 16.909, Sumar á Selfossi/Olísmótið kr. 35.711 og Aldamótahátíð á Eyrarbakka kr. 31.024. d) Menningarnefnd tók þá ákvörðun með samhljóða samþykkt sinni í júlí sl., sbr. 3. mál á 1. fundi, að allar opinberar hátíðir á sviði menningar og ferðaþjónustu í sveitarfélaginu hlytu styrk sem þennan. e) Verkefnisstjóri var í fríi megnið af þessum tíma og tók formaður menningarnefndar framkvæmd þessa máls að sér. f) Það verður ákveðið við vinnu nefndarinnar við fjárhagsáætlun næsta árs sem unnin verður í haust, ákvörðun menningarnefndar frá í júlí sl. þar sem það var samhljóða samþykkt að fara út í þennan stuðning, kom skýrt fram að um tilraun væri að ræða sem endurskoðuð yrði síðan í haust. g) Það vissu allir aðilar í nefndinni þegar þetta var samþykkt í júlí sl. að um tilraun væri að ræða og að kostnaði vegna þessa framtaks yrði vísað til endurskoðunar fjárhagsáætlunar.
Bókun frá fulltrúa S-lista: ,,Það að pólitískir formenn nefnda Sveitarfélagsins Árborgar gangi í störf starfsmanna sveitarfélagsins er að mínu viti ótækt. Nauðsynlegt er að reglur séu samdar um auglýsingar sveitarfélagsins til styrktar hátíðum og menningarviðburðum innan þess. “
4. 1009141 - Fjárhagsstaða menningarmála S.Á.
Fyrirspurn frá Kjartani Ólasyni fulltrúa S- lista, til meirihluta nefndarinnar : ,,Hver er fjárhagsstaða málaflokksins samkvæmt 6 mánaða uppgjöri sveitarfélagsins?” Eins og fram kom í útsendum gögnum þá var staðan á málaflokk 05 við 6 mánaða uppgjör 105% af áætlun eða alls kr. 57.447.570, eða 52% miðað við 12 mánaða áætlun. Heildaráætlun fyrir málaflokk 05 fyrir 2010 hljóðaði upp á kr.110.513.000. Verkefnisstjóri upplýsti að staða málaflokksins nú í dag væri 73% af heildaráætlun eða kr. 80.720.530 og lagði fram gögn þar að lútandi á fundinum.
Fulltrúi S-lista bókar: ,,Fulltrúi S-lista lýsir yfir ánægju sinni með niðurstöðu framlagðra gagna. Á þeim má ráða að málaflokkurinn hefur verið í traustum höndum sl. 9 mánuði. Vonandi verður áframhald á þessari málsmeðferð.”
5. 1007061 - Hernám Breta 70 ára
Formaður fór yfir og reifaði ýmsar hugmyndir sem væru í gangi varðandi afmælisdagskrá hernámsafmælisins, útfærslu og samstarfsaðila. Hugmynd meirihluta nefndarinnar er að ráða sérstakan verkefnisstjóra að verkefninu og leggur formaður til að Gunnar Sigurgeirsson verði ráðinn til verksins og að formanni menningarnefndar verði falið að semja við viðkomandi í samráði við formann bæjarráðs. Formaður upplýsi jafnframt á næsta fundi menningarnefndar væntanlega starfstilhögun. Verkefnisstjóri upplýsti og að þegar væri hafinn undirbúningur að þátttöku Bókasafns Árborgar í viðburðum og hátíðarhöldum næstu mánaða. Samstarf væri fyrirhugað við ýmsa aðila, s.s. Héraðsskjalasafnið, Leikfélag Selfoss o.fl.
Bókun fulltrúa S-lista varðandi framkomna tillögu: ,,Situr hjá varðandi tillögu meirihluta nefndarinnar. Fulltrúi S-lista leggur til að meirihluti menningarnefndar nýti sér sambönd sín og fái til þessa verkefnis til skrafs og ráðagerða þá Björn Bjarnason fv. mennta- og dómsmálaráðherra og Guðmund Kristinsson, fv. bankagjaldkera.” Allir fulltrúar menningarnefndarinnar sammála að tengja þennan viðburð við Safnahelgi á Suðurlandi sem fram fer dagana 5. - 7. nóvember nk. Fundarhlé var tekið kl. 10:00. Fundur settur 10:09.
6. 1007015 - Menningarmánuðurinn október
Formaður greinir frá að undirbúningur sé hafinn af fullum krafti og verður nánar gert grein fyrir dagskránni á næsta fundi menningarnefndar sem verður miðvikudaginn 22. september kl. 17:00. Vísað er að öðru leyti í niðurstöður á afgreiðslu málanna 1007015 (4) og 1007012 (9) á fyrsta fundi LMÁ sem samþykkt var í bæjarráði.
Bókun fulltrúa S- lista varðandi málið. ,,Fram kemur í málflutningi formanns nefndarinnar að haft hafi verið samband við aðstandendur Guðmundar Daníelssonar, hefur verið haft samband við aðra aðstandendur, s.s. Páls Lýðssonar, Páls Ísólfssonar og Sigurjóns Ólafssonar varðandi umrædd minningarkvöld?” Formaður upplýsir að haft hafi verið samband við aðstandendur Páls Lýðssonar, aðstandendur Páls Ísólfssonar og Listasafn Árnesinga varðandi Sigurjón Ólafsson.
7. 1009054 - Uppsetning á byggðamerkjum
Afgreiðslu málsins frestað til næsta fundar menningarnefndar.
8. 1009070 - Safnahelgi á Suðurlandi 2010
Safnahelgi á Suðurlandi verður haldin helgina 5.-7. nóvember nk. Formaður safna á Suðurlandi Barbara Guðnadóttir boðaði til fundar í vikunni sem leið með öllum hlutaðeigandi aðilum og sátu Heiðrún Dóra Eyvindardóttir, forstöðumaður Bókasafns Árborgar, og Bragi Bjarnason, íþrótta- og tómstundafulltrúi, fundinn sem fulltrúar sveitarfélagsins. Nánar verður gert grein fyrir stöðu mála er nær dregur safnahelginni. LMÁ þakkar upplýsingarnar og vísar í samþykkt máls no. 5 hér að framan.
9. 1008062 - Útsvar - spurningakeppni sveitarfélaganna
Útsvar, spurningakeppni sveitarfélaganna verður á vetrardagskrá Sjónvarpsins fjórða árið í röð. Eftirtaldir munu keppa fyrir hönd Sveitarfélagsins Árborgar: Páll Ólason, nemi, Þorsteinn Tryggvi Másson, héraðsskjalavörður og Hanna Lára Gunnarsdóttir, grunnskólakennari í Vallaskóla. LMÁ þakkar upplýsingarnar og óskar keppendum góðs gengis.
10. 1008018 - Styrkir til ferðaþjónustu 2005-2010
Ferðamálastofa kallaði eftir upplýsingum um styrkveitingar sveitarfélaganna á tímabilinu 2005-2010 í tilefni þess að verið er að gera úttekt á styrkveitingum hins opinbera til ferðaþjónustutengdra verkefna. Óskað var eftir upplýsingum um: a) fjölda og upphæð styrkja eftir árum b) styrkþega eftir árum c) verkefni sem lágu til grundvallar styrkjum og staðsetningu verkefna á landinu d) árangursmat, hefur það verið gert og þá með hvaða hætti. Verkefnisstjóri lagði fram niðurstöður þessarar samantektar á fundinum. LMÁ þakkar upplýsingarnar og öllum þeim sem komu að þessari samantekt.
11. 1008090 - Menningarsamskipti við San Antonio
LMÁ lýsir ánægju sitt með fyrirhugað samstarf listamanna San Antonio og Íslands. George Schroeder, sem mun að líkindum vinna með íslenska listamanninum, Guðjóni Bjarnasyni, tilkynnti um leið og hann afhenti formanni bæjarráðs bréf frá borgarstjóra San Antonio varðandi fyrirhugað samstarf, að hann væri tilbúinn að færa Sveitarfélaginu Árborg listaverk að gjöf og lagði fram teikningar af verkinu. LMÁ samþykkir framkvæmdina og biður um að vera höfð með í ráðum þegar framtíðarstaðsetning verksins verður ákveðin. Bæjarráð hefur falið framkvæmdastjóra sveitarfélagsins að rita borgarstjóra San Antonio bréf varðandi málið og framvindu þess.
Fulltrúi S-lista situr hjá við þessa afgreiðslu og óskar að bóka eftirfarandi: ,,Hvenær komst á pólitískt samstarf á millum Arnalds og Castro? Hvað er að frétta af Fidel?”
12. 1007035 - Afmæli Skógræktarfélags Íslands - 80 ára
LMÁ þakkar upplýsingarnar.
13. 1007038 - Ráðstefnur um menningarmál í Noregi 2010
LMÁ þakkar upplýsingarnar .
14. 1007085 - Sumar á Selfossi 2010
Framkvæmd metnaðarfullrar dagskrár á hátíðarhöldunum, Sumar á Selfossi, dagana 5.-8. ágúst sl. tókst í alla staði vel og var fjölsótt. LMÁ þakkar upplýsingarnar.
15. 1008010 - Listaverk í Hellisskógi að gjöf
LMÁ tekur undir þakkir bæjarráðs til Borghildar Óskarsdóttur, vegna gjafar á myndlistarverki í Hellisskógi sem var hluti af sýningunni Ferjustaðir 2009.
16. 1007090 - Styrkbeiðni - Færeyskir dagar á Stokkseyri
LMÁ tekur undir orð bæjarráðs Árborgar um frábært framtak hjá Lista- og menningarverstöðinni sem stóð fyrir að auglýsa hátíðina í útvarpi, sbr. mál no. 2 hér að framan. Fulltrúi S-lista óskar að bóka eftirfarandi: ,,Athygli vekur að Færeyskir dagar á Stokkseyri fá undir 20 þúsund krónum í styrk frá Sveitarfélaginu Árborg á meðan að næsta dagskrármál, Aldamótahátíðin á Eyrarbakka, er með á þriðja hundrað þúsund.
17. 1006089 - Styrkur - Aldamótahátíð á Eyrarbakka 14.-15. ágúst 2010
Fram kom að bæjarráð hefði samþykkt kr. 200.000 styrk til Aldamótahátíðarinnar á Eyrarbakka og vísað kostnaði til endurskoðunar fjárhagáætlunar.
LMÁ er sammála bæjarráði að nauðsynlegt sé að endurskoða reglur um styrkveitingar til hátíðahalda fyrir gerð næstu fjárhagsáætlunar og tekur undir að hlutaðeigendur sæki um í auglýstar úthlutanir menningarstyrkja.
18. 1007022 - Kaffiveitingar í Bókasafni Árborgar
Bæjarráð Árborgar samþykkti að boðið verði upp á kaffi í Bókasafni Árborgar til áramóta og settur verði upp baukur. LMÁ þakkar upplýsingarnar. Fulltrúi S-lista óskar að bóka eftirfarandi: ,,Verður einnig boðið upp á te og ávaxtasafa?”
19. 1007091 - Stofnun myndlistarskóla í Árborg
LMÁ fagnar framtaki Eyglóar Jósephsdóttur og þakkar upplýsingarnar.
20. 1006008 - Breytingar á samþykktum Sveitarfélagsins Árborgar
Samþykkt var samhljóða við síðari umræðu á 4. bæjarstjórnarfundi Árborgar, sem haldinn var miðvikudaginn 8. september 2010, að framvegis skuli lista- og menningarnefnd heita menningarnefnd.
Andrés Sigurvinsson, verkefnisstjóri íþrótta-, forvarna- og menningarmála þakkaði í lok fundar öllum sem hann hefur starfað með innan LMÁ á liðnum árum samstarfið.
Fulltrúi S-lista þakkar góða viðkynningu og óskar honum velfarnaðar í störfum hans í náinni framtíð.
Fulltrúi D-lista þakkar verkefnisstjóra sömuleiðis góð störf í þágu sveitarfélags og óskar honum velfarnaðar á öðrum vettvangi.
Fundargerð lesin upp og fundi slitið kl: 10:55
Kjartan Björnsson
Björn Ingi Bjarnason
Kjartan Ólason
Andrés Sigurvinsson
