4. fundur bæjarstjórnar
4. fundur bæjarstjórnar Árborgar, kjörtímabilið 2006-2010, haldinn miðvikudaginn 11. október 2006 kl. 17.00 í Ráðhúsi Árborgar, Selfossi.
Neðanskráðir bæjarfulltrúar eru mættir:
Þorvaldur Guðmundsson B listi
Margrét Katrín Erlingsdóttir B listi
Þórunn Jóna Hauksdóttir D listi
Snorri Finnlaugsson D listi
Ari Thorarensen D listi, varamaður Elfu D. Þórðardóttur
Kristín Hrefna Halldórsdóttir D listi, varamaður Gríms Arnarsonar
Ragnheiður Hergeirsdóttir S listi
Gylfi Þorkelsson S listi
Jón Hjartarson V listi
Auk þess sitja fundinnStefanía Katrín Karlsdóttir, bæjarstjóri, ogÁsta Stefánsdóttir, bæjarritari, sem ritar fundargerð.
Forseti leitaði afbrigða til að taka á dagskrá beiðni Elfu Daggar Þórðardóttur um leyfi frá bæjarstjórnarstörfum, svo og til að taka á dagskrá liði 16, 17 og 18 úr fundargerð skipulags- og byggingarnefndar frá 28. september 2006.
Var það samþykkt.
Ragnheiður Hergeirsdóttir, S-lista, lagði fram eftirfarandi tillögu:
Bæjarstjórn samþykkir að mál 5 undir liðnum önnur mál, svör við fyrirspurnum, verði færður fram og verði nr. 2 undir liðnum önnur mál.
Innihald fyrirspurna varða m.a. mál sem áætlað er að afgreiða á fundinum; sérstakar húsaleigubætur, og eðlilegt er að svör við fyrirspurnum verði lögð fram áður en afgreiðsla málsins fer fram.
Var tillagan samþykkt.
Dagskrá:
I. Fundargerðir:
1.
a) Framkvæmda- og veitustjórn frá 30.08.06
b) Skólanefnd grunnskóla frá 04.09.06
c) Þjónustuhópur aldraðra frá 14.06.06 og 06.09.06
d) Yfirkjörstjórn frá 15.05.06, 18.05.06, 22.05.06, 23.05.06, 26.05.06, 27.05.06, 30.05.06, 08.06.06.
e) Kjörstjórnir I-V frá 23.05.06 og 27.05.06
f) 11. fundur bæjarráðs frá 12.09.06
2.
a) Félagsmálanefnd frá 11.09.06
b) 12. fundur bæjarráðs frá 21.09.06
3.
a) Skipulags- og byggingarnefnd frá 14.09.06
b) Leikskólanefnd frá 20.09.06
c) Íþrótta- og tómstundanefnd frá 20.09.06
d) Menningarnefnd frá 27.09.06
e) 13. fundur bæjarráðs frá 05.10.06
1-a.
Gylfi Þorkelsson, S-lista, tók til máls og lagði fram tillögu:
Bæjarstjórn samþykkir að fenginn verði utan að komandi sérfræðingur til að taka út alla starfsemi Framkvæmda- og veitusviðs hjá sveitarfélaginu. Markmiðið með úttektinni er að auka hagkvæmni og skilvirkni, stytta afgreiðslutíma mála og bæta þjónustu sveitarfélagsins við viðskiptavini sína, en gríðarlegt álag er nú á starfsmönnum vegna íbúafjölgunar og þenslu í sveitarfélaginu. Í úttektinni fælist m.a. greining á starfsemi sviðsins, með virkri þátttöku starfsmanna og mat á kostum þess að
a) skipta verkefnum Skipulags- og bygginganefndar upp í tvo málaflokka, leggja niður núverandi starf byggingafulltrúa og stofna í staðinn tvö störf, starf skipulagsfulltrúa og starf byggingafulltrúa.
b) Efla tæknisvið verulega þannig að sveitarfélagið gæti sjálft sinnt stærstum hluta verkefna, s.s. teiknivinnu af ýmsu tagi, en nú eru nánast öll slík verk keypt að. Úttektinni verði hraðað þannig að henni verði lokið og tillögur um breytingar liggi fyrir eigi síðar en 1. febrúar á næsta ári.
Greinargerð:
Nú eru bráðum liðnir fjórir mánuðir frá því að fulltrúi S-lista lagði fram samhljóða tillögu á fundi Framkvæmda- og veitustjórnar. Tillögunni var vísað í einhverja vinnu sem sögð var í gangi um málið. Eftir ítrekun með fyrirspurn 30. ágúst s.l. hafa enn engar upplýsingar borist um þessa vinnu. Því vakna óneitanlega efasemdir um að nokkuð hafi verið unnið í málinu, þrátt fyrir yfirlýsingar formanns Framkvæmda- og veitustjórnar þess efnis á 131. fundi hennar þann 22. júní s.l. Undirrituð telja einnig fullkomlega óeðlilegt og óviðeigandi, burt séð frá hæfni viðkomandi starfsmanns, að framkvæmdastjóri viðkomandi sviðs sjái um og stjórni úttekt á eigin starfsemi og þar með sjálfum sér.
Því er fyrri tillaga ítrekuð og lögð fyrir bæjarstjórn með von um að hún setji þessa vinnu af stað af fullri alvöru og fái til þess utanaðkomandi aðila.
Gylfi Þorkelsson og Ragnheiður Hergeirsdóttir, S-lista.
Eftirtaldir tóku til máls:
Snorri Finnlaugsson, D-lista, Stefanía Katrín Karlsdóttir, bæjarstjóri,
Gylfi Þorkelsson, S-lista, Ragnheiður Hergeirsdóttir, S-lista.
Þórunn Jóna Hauksdóttir, D-lista, bað um fundarhlé og var það veitt.
Að loknu fundarhléi lagði Snorri Finnlaugsson D-lista, fram eftirfarandi tillögu:
Fram hefur komið að vinna við endurskoðun á skipulagi og starfsemi Framkvæmda- og veitusviðs er í gangi undir forystu bæjarstjóra og því er lagt til að tillögunni verði vísað frá.
Tillagan var samþykkt með sex atkvæðum fulltrúa B og D lista, fulltrúar V og S lista voru á móti.
Gylfi Þorkelsson, S-lista, tók til máls og óskaði eftir að bókað yrði:
Undirritaður mótmælir því að hann sem fulltrúi í framkvæmda- og veitustjórn hafi enga hugmynd um þá vinnu sem er í gangi við endurskoðun á sviðinu.
1-b.
Ragnheiður Hergeirsdóttir tók til máls og lagði fram fyrirspurn:
Hvers vegna var ákveðið að fækka biðskýlum fyrir nemendur BES miðað við það sem áður hafði verið ákveðið og kynnt hafði verið fyrir nemendum og foreldrum við upphaf skólaársins?
Hvenær má gera ráð fyrir að skýlin verði sett niður og frágengin?
Ljóst er að aðkoma skólabíls við bæði skólahúsin við ströndina er allsendis óviðunandi og beinlínis hættuleg á Stokkseyri. Má teljast lán að ekki hafi orðið slys við þessar aðstæður. Stendur til að bæta úr þessari aðstöðu og ef svo er, hvenær má þá búast við að það verði?
Ragnheiður Hergeirsdóttir og Gylfi Þorkelsson, S-lista.
1-f, liður 2c.
Ragnheiður Hergeirsdóttir tók til máls og lagði fram bókun:
Það er yfirlýst stefna ríkisstjórnarinnar að þjónusta við aldraða skuli skipulögð og framkvæmd þannig að reynt sé að koma í veg fyrir að aldrað fólk þurfi að dveljast á stofnunum. Í Sveitarfélaginu Árborg er mikil þörf á þjónusturými fyrir fólk með heilabilun í dagdvöl aldraðra. Heilbrigðis- og tryggingamálaráðherra hefur hafnað umsókn sveitarfélagsins um fjölgun slíkra rýma. Fulltrúar Samfylkingarinnar skora á meirihluta D og B lista að leita allra leiða til að fá ráðherra til að endurskoða fyrri ákvörðun sína. Um er að ræða mikið réttinda- og mannúðarmál fyrir fólk með heilabilun og fjölskyldur þeirra. Fyrirbyggjandi áhrif dagdvalar aldraðra eru mjög mikil jafnt fyrir viðkomandi sjúkling sem fjölskyldu hans og vitað að slík þjónusta skiptir sköpum fyrir þá sem við þessar aðstæður búa.
Ragnheiður Hergeirsdóttir og Gylfi Þorkelsson, S-lista
1-f, liður 5.
Ragnheiður Hergeirsdóttir tók til máls og lagði fram bókun:
Undirrituð mótmæla ákvörðun meirihluta D og B lista um að selja félagslegar íbúðir í eigu sveitarfélagsins á sama tíma og þörfin eftir slíku húsnæði eykst og a.m.k. 20 fjölskyldur eiga umsóknir um slíkar íbúðir. Minnt er á að til að eiga fullgilda umsókn þarf umsækjandi sannanlega að búa við mjög þröngan fjárhag.
Í lögum um félagsþjónustu sveitarfélaga er kveðið á um “að sveitarstjórnir skulu, eftir því sem kostur er og þörf er á, tryggja framboð af leiguhúsnæði, félagslegu kaupleiguhúsnæði og/eða félagslegum eignaríbúðum handa þeim fjölskyldum og einstaklingum sem ekki eru á annan hátt færir um að sjá sér fyrir húsnæði sökum lágra launa, þungrar framfærslubyrðar eða annarra félagslegra aðstæðna.”( 45. gr. laga nr. 40/1991).
Ákvörðun um sölu 9 íbúða nú er í hróplegu ósamræmi við laganna hljóðan og fulltrúar S-listans og V-lista lýsa yfir þungum áhyggjum sínum yfir þessari stefnu og aðför meirihlutaflokkanna að velferð þess hóps íbúa í sveitarfélaginu sem býr við hvað erfiðastar aðstæður.
Ragnheiður Hergeirsdóttir og Gylfi Þorkelsson, S-lista og Jón Hjartarson, V-lista.
2-b.
Gylfi Þorkelsson tók til máls og lagði fram bókun:
Undirrituð benda á bókun frá 12. fundi bæjarráðs þann 21. september s.l. þar sem gerðar voru athugasemdir við vinnubrögð meirihlutans og alvarlegan skort á upplýsingaflæði til minnihlutafulltrúanna. Þrátt fyrir ítrekaðar ábendingar um að málsgögnum sem liggja afgreiðslu mála til grundallar sé haldið frá minnihlutafulltrúum fram á síðustu stundu, og jafnvel ekki birt þeim fyrr en á fundum þegar taka á mál til afgreiðslu, hafa engar vísbendingar sést í þá átt að til standi að breyta þessu vinnulagi. Nýjasta dæmið er fundargerð félagsmálanefndar frá því 9. október, fyrir tveimur dögum, þar sem afgreiðsla nefndarinnar liggur máli 2 í lið II hér á þessum fundi til grundvallar. Klukkan 00.30 sl. nótt var ekki hægt að nálgast þessa fundargerð á heimasíðu sveitarfélagsins. Undirrituð mótmæla því harðlega að vinnubrögð af þessu tagi séu viðhöfð, enda eru þau dæmi um ólíðandi stjórnsýsluhætti.
Ragnheiður Hergeirsdóttir, Gyfli Þorkelsson, S-lista og Jón Hjartarson, V-lista.
3-c, liður 4.
Kristín Hrefna Halldórsdóttir, D-lista, tók til máls og fagnaði tillögu nefndarinnar.
3-e, liður 1b.
Jón Hjartarson, V-lista, tók til máls og lagði fram eftirfarandi bókun:
Undirritaður ítrekar bókun um þennan lið í fundargerð 13. fundar bæjarráðs þar sem lýst er andstöðu við að taka upp valgreiðslur til forráðamanna barna skv. tillögu meirihluta leikskólanefndar. Valgreiðslukerfið er ekki valkostur um hvort forráðamenn barna geti verið frá vinnu til þess að vera heima hjá ungum börnum, hér er um allt of lága greiðslu að ræða til þess að búinn sé til valkostur á milli vinnu og samveru við barn. Valgreiðslukerfið ýtir undir félagslega einangrun kvenna í láglaunastörfum, sbr ýmsar rannsóknir í nágrannalöndunum og stríðir gegn jafnréttishugmyndum þar sem val um að vera heima snýr fyrst og fremst að konunni en síður karlinum sem oftar en ekki aflar meiri heimilistekna.
Jón Hjartarson, V-lista.
3-e, liður 1c.
Jón Hjartarson, V-lista, tók til máls og lagði fram eftirfarandi bókun:
Undirritaður ítrekar bókun frá fundi bæjarráðs þar sem varað er við öllum hugmyndum um frekari uppbyggingu íþróttamannvirkja við Engjaveg á Selfossi og hvatt til þess að nú þegar verði hafinn undirbúningur að skipulagi nýs fjölnota íþróttasvæðis í sveitarfélaginu.
Undirritaður telur að við gerð fjárhagsáætlunar fyrir árið 2007 verði ætlaðir fjármunir til undirbúningsvinnu vegna skipulagningar á nýju íþróttasvæði.
Jón Hjartarson,V-lista.
Þórunn Jóna Hauksdóttir, D-lista, bað um fundarhlé og var það veitt.
3-f, liður 3.
Þórunn Jóna Hauksdóttir, D-lista, lagði fram svohljóðandi bókun:
Meirihluti bæjarstjórnar bendir á fjölda þeirra foreldra sem nú þegar velja að taka lengra fæðingarorlof en kveðið er á um í lögum. Þessar valgreiðslur koma vissulega til með að létta undir t.d. á þeim heimilum. Bent er á að skv. fæðingarorlofslögum er fæðingarorlof foreldra 9 mánuðir. Mörg dæmi eru þess að feður taki meirihluta orlofsins og sýnir það meðvitund foreldra um mikilvægi þátttöku beggja foreldra í uppeldi og ummönnun barns.
3-e, liður 3.
Ragnheiður Hergeirsdóttir, S-lista, tók til máls og óskaði eftir að bókað yrði að fulltrúar Samfylkingarinnar tækju undir tillögu Jóns Hjartarsonar, V-lista, á fundi bæjarráðs.
Ragnheiður Hergeirsdóttir, S-lista, lagði fram svohljóðandi bókun:
Fulltrúar Samfylkingarinnar ítreka þá afstöðu sem fram kemur í bókun fulltrúa Samfylkingarinnar liður 3, um lækkun leikskólagjalda og gjaldfrjálsan leikskóla 5 ára barna í áföngum.
Varðandi endurskoðun innritunarreglna þá leggja fulltrúar Samfylkingarinnar þunga áherslu á að gætt verði sérstaklega að hag efnaminni fjölskyldna.
Ragnheiður Hergeirsdóttir S-lista, og Þórunn Jóna Hauksdóttir, D-lista, tóku til máls.
Fundargerðirnar staðfestar.
II. Önnur mál
1. Nafnasamkeppni vegna leikskóla við Erlurima
Bæjarstjórn samþykkir tillögu leikskólanefndar um að leikskólinn við Erlurima hljóti nafnið Hulduheimar.
2. Svör við fyrirspurnum
Svar við fyrirspurn Ragnheiðar Hergeirsdóttur, S-lista, á fundi bæjarstjórnar 13.09.06 um þörf fyrir félagslegt húsnæði og rétt til sérstakra húsaleigubóta.
Hluti þeirra fjölskyldna sem þurfa á félagslegu leiguhúsnæði að halda á hverjum tíma er í tímabundinni þörf fyrir aðstoð vegna félagslegra erfiðleika, s.s. vegna veikinda, áfalla, aðstæðna á atvinnu- og/eða húsnæðismarkaði. Slík tilvik koma upp hjá íbúum Árborgar sem og íbúum annarra sveitarfélaga. Við slíkar aðstæður nýtist félagslegt leiguhúsnæði sem úrræði til sjálfshjálpar. Ætla má að þriðjungur þeirra sem eru á biðlista eftir félagslegu húsnæði uppfylli skilyrði sem sett eru í tillögu að breytingu á reglum um félagslegt leiguhúsnæði í Árborg um rétt til sérstakra húsaleigubóta.
Ragnheiður Hergeirsdóttir, S-lista, bað um fundarhlé og var það veitt
Ragnheiður Hergeirsdóttir, S-lista, tók til máls og lagði fram bókun:
Í svarinu kemur fram að þriðjungur þeirra sem eru á biðlista uppfylli skilyrði um rétt til sérstakra húsaleigubóta. Það þýðir að 18 umsækjendur standa eftir á biðlista. Ákveðið hefur verið að selja 9 íbúðir og því ljóst að vandinn mun aukast til muna við þá aðgerð, þrátt fyrir sérstakar húsaleigubætur.
Svar við fyrirspurn Jóns Hjartarsonar, V-lista, á fundi bæjarstjórnar 13.09.06 um arkitektasamkeppni.
Meirihlutinn tekur undir mikilvægi þess að miðbærinn beri samræmdan heildarsvip. Þess vegna er mikilvægt að ekki verði farið í neinar framkvæmdir á svæðinu fyrr en niðurstöður samkeppninnar liggja fyrir. Samkeppnin nær til þess svæðis sem skilgreint var í maí s.l. og staðfest í samkeppnislýsingu nú í september, og afmarkast svo: ,,Austurmörk eru við Ölfusá á móts við Tryggvagötu. Tryggvagötu fylgt til suðurs að lóðinni nr. 12 við Tryggvagötu. Sunnan lóðarinnar nr. 12 er snúið 90° til vesturs að götunni Sigtúni og henni fylgt til suðurs að Sunnuvegi. Sunnuvegi fylgt til vesturs að Kirkjuvegi. Kirkjuvegi fylgt til norðurs og norðvesturs að Ölfusá við Básinn, þar sem vesturmörk reitsins eru.”
Jón Hjartarson, V-lista, tók til máls.
3. Sérstakar húsaleigubætur
Gylfi Þorkelsson, S-lista, tók til máls og lagði fram svofellda tillögu:
Bæjarstjórn samþykkir að fresta umræðum um og afgreiðslu liðar 3 á dagskrá fundarins, sérstökum húsaleigubótum, vegna þess að grundvallargögn um málið lágu ekki tímanlega fyrir.
Gylfi Þorkelsson og Ragnheiður Hergeirsdóttir, S-lista, og Jón Hjartarson, V-lista.
Þórunn Jóna Hauksdóttir, D-lista, bað um fundarhlé og var það veitt.
Margrét Katrín Erlingsdóttir, B-lista, tók til máls og lagði fram svofellda breytingartillögu vegna tillögu Gylfa Þorkelssonar, Ragnheiðar Hergeirsdóttur og Jóns Hjartarsonar:
Bæjarstjórn samþykkir að taka upp greiðslur sérstakra húsaleigubóta frá og með 1. janúar 2007. Bæturnar verði reiknaðar sem ákveðið hlutfall af almennum húsaleigubótum eins og þær eru ákvarðaðar samkvæmt lögum nr. 138/1997, þannig að fyrir hverjar 1.000 krónur í almennum húsaleigubótum fái umsækjandi 1.300 krónur í sérstakar húsaleigubætur. Þó geti almennar húsaleigubætur og sérstakar húsaleigubætur aldrei numið hærri fjárhæð en samtals kr. 60.000 og aldrei farið yfir 75% af leigufjárhæð.
Ragnheiður Hergeirsdóttir, S-lista, bað um fundarhlé og var það veitt.
Tillaga Margrétar var borin undir atkvæði og samþykkt með 6 atkvæðum fulltrúa B og D lista. Fulltrúar S og V lista sátu hjá.
Gylfi Þorkelsson tók til máls og gerði grein fyrir atkvæðagreiðslu fulltrúa S- og V-lista, með eftirfarandi bókun:
Samkvæmt upplýsingum framkvæmdastjóra Fjölskyldumiðstöðvar Árborgar er meðal húsaleiga þeirra sem nú fá greiddar almennar húsaleigubætur og leigja á almennum leigumarkaði kr. 72.926. Meðal húsaleiga þeirra sem leigja félagslegt húsnæði í Árborg er hinsvegar 34.883 krónur eða um helmingi lægri.
Nú eru 27 umsóknir á biðlista eftir félagslegu húsnæði. Meirihlutinn hyggst selja 9 félagslegar leiguíbúðir á næstu misserum. Við það mun biðlistinn lengjast. Af biðlistanum munu einungis þeir sem búa við erfiðastar félagslegar aðstæður eiga kost á sérstökum húsaleigubótum.
Það er ljóst að sérstakar húsaleigubætur eru góð viðbót við núverandi félagsþjónustu í Árborg og undirrituð fagna því framfaraskrefi. En það er algerlega óraunsætt að halda að sérstakar húsaleigubætur geti komið í staðinn fyrir félagslegt leiguhúsnæði eða að þessi aðgerð stytti biðlista eftir slíku húsnæði. Í ljósi þess að sérstakar húsaleigubætur eiga að koma í staðinn fyrir félagslegt leiguhúsnæði í eigu sveitarfélagsins, skv. fyrri samþykktum meirihlutans, sitja undirrituð hjá við afgreiðslu málsins.
Gylfi Þorkelsson og Ragnheiður Hergeirsdóttir, S-lista, og Jón Hjartarson, V-lista.
4. Uppbygging þjónustu við aldraða og stækkun þjónustuhúsnæðis við Grænumörk - tillaga frá Ragnheiði Hergeirsdóttur og Gylfa Þorkelssyni, S-lista.
Bæjarstjórn Árborgar samþykkir að ganga þegar í stað til framhaldsviðræðna við fulltrúa Fossafls ehf. á grundvelli viljayfirlýsingar frá 9. maí 2006. Uppbygging þjónustu við aldraða og stækkun þjónustuhúsnæðis við Grænumörk er löngu orðin tímabær og mikið hagsmunamál fyrir íbúa sveitarfélagsins að ekki verði frekari tafir á þessu verkefni. Samhliða viðræðum um þessa uppbyggingu verði allra leiða leitað til að ná sem bestri sátt við íbúa í hverfinu um skipulag og byggingar á umræddum lóðum.
Greinargerð
Þann 9. maí s.l. var undirrituð viljayfirlýsing Sveitarfélagsins Árborgar við Fossafl ehf. vegna stækkunar þjónustumiðstöðvar aldraða við Grænumörk 5 á Selfossi og aðstöðu fyrir hjúkrunarheimili. Áætlað var samhliða að ganga til samningaviðræðna við Fossafl ehf. um kaup á húsunum Grænumörk 1-3 af Leigubústöðum Árborgar ehf. Kaupin yrðu skilyrt því að samkomulag næðist um rekstur hjúkrunarheimilis í húsunum. Stefnt yrði að sérstöku samkomulagi við Fossafl um að tryggja leigurétt fyrir viðskiptavini Leigubústaða Árborgar ehf. í allt að 40 íbúðum.
Áætlanir Fossafls voru þær að byggja og reka húsnæði við Austurveg á Selfossi. Í húsnæðinu var, auk íbúða, gert ráð fyrir ýmiss konar þjónustu sem beint gæti nýst íbúum hússins en aðrir íbúar sveitarfélagsins hefðu einnig aðgang að. Sveitarfélagið hefði tækifæri til þess að hafa áhrif á hönnun og útfærslu byggingarinnar að hluta. Um er að ræða einstakt tækifæri til myndarlegrar uppbyggingar á þjónustu við aldraða og óásættanlegt að láta slíkt tækifæri úr greipum renna.
Fyrirhugaðar byggingar Fossafls ehf., sem m.a. munu hýsa umrædda þjónustustarfsemi fyrir aldraða, hafa valdið miklum áhyggjum og óánægju meðal íbúa í svo nefndu “Mjólkurbúshverfi”. Snýst það um hæð húsanna og staðsetningu þeirra á lóðum, en ekki er um að ræða andstöðu við uppbyggingu þjónustu fyrir aldraða á þessu svæði.
Þegar um er að ræða breytingar á skipulagi og nýjar byggingar inni í eldri hverfum er ekki óvanalegt að ólík sjónarhorn stangist á eins og hér er um að ræða. Þegar opinber aðili eins og sveitarfélag á hlut að máli má eðlilegt teljast að sveitarfélagið hafi forgöngu um að leita sátta og finna niðurstöðu sem aðilar máls geta sætt sig við. Nauðsynlegt er að koma þessum málum báðum í höfn því miklir hagsmunir eru í húfi fyrir alla hlutaðeigandi. Því er þessi tillaga lögð fram nú.
Ragnheiður Hergeirsdóttir og Gylfi Þorkelsson, S-lista.
Ragnheiður Hergeirsdóttir tók til máls.
Jón Hjartarson, V-lista, tók til máls og lagði fram bókun:
Tek undir og styð tillögu Ragnheiðar Hergeirsdóttur og Gylfa Þorkelssonar um “uppbyggingu þjónustu við aldraða og stækkun þjónustuhúsnæðis við Grænumörk”.
Þórunn Jóna Hauksdóttir, D-lista, tók til máls og lagði fram svofellda tillögu:
Viðræður við Fossafl ehf standa yfir og málið er í ákveðnu ferli hjá skipulagsyfirvöldum. Því er lagt til að tillögunni verði vísað frá.
Fulltrúar B og D lista.
Samþykkt með 6 atkvæðum fulltrúa B- og D-lista. Fulltrúar S- og V-lista greiddu atkvæði á móti.
Ragnheiður Hergeirsdóttir tók til máls og lagði fram bókun:
Á fundi bæjarráðs þann 13. júlí s.l. var samþykkt að haldið yrði áfram viðræðum við Fossafl ehf. á grundvelli viljayfirlýsingar vegna stækkunar þjónustumiðstöðvar aldraðra við Grænumörk 5 á Selfossi og aðstöðu fyrir hjúkrunarheimili. Var forseta bæjarstjórnar, formanni bæjarráðs, bæjarstjóra og fulltrúa minnihlutans falið verkið. Einn fundur var boðaður í júlí, þar sem láðist að boða fulltrúa minnihlutans. Boðuðum fundi sem vera átti 16. ágúst var frestað og enginn fundur hefur verið boðaður síðan þá.
Á fundi bæjarstjórnar þann 13. september s.l. lögðu fulltrúar Samfylkingar fram eftirfarandi tillögu: “Í ljósi athugasemda Skipulagsstofnunar, dags. 23. júní 2006 samþykkir bæjarstjórn Árborgar að stofna vinnuhóp sem hafi það hlutverk að freista þess að ná sátt milli íbúa svokallaðs Mjólkurbúshverfis, eiganda lóðanna við Austurvegi 51-59 á Selfossi og skipulagsyfirvalda um skipulag á þessum lóðum”.
Á fundinum óskaði meirihlutinn eftir fundarhléi og að því loknu bar formaður bæjarráðs upp frávísunartillögu í nafni B og D lista og var hún samþykkt með sex atkvæðum B og D lista. Fulltrúar S og V lista greiddu atkvæði gegn tillögu meirihlutans. Af orðum formanns bæjarráðs, sem ekki voru færð til bókar, mátti skilja að í gangi væru viðræður við íbúa og eigendur lóðanna við Austurveg 51-59. Ekki hafði þó þótt ástæða til að kynna minnihlutanum stöðu málsins þrátt fyrir að þann 13. júlí hafi verði skipaður vinnuhópur um samstarf sveitarfélagsins við eigendur lóðanna og minnihlutinn eigi fulltrúa í þeim hópi. Slík vinnubrögð eru ekki í anda nútíma stjórnsýslu og vinnubragða og enn eitt dæmið um ólýðræðislega starfshætti meirihluta B og D lista.
Fulltrúar S lista lýsa yfir undrun sinni á vinnubrögðum meirihlutans í þessu máli og krefjast þess að minnihlutinn verði hafður með í ráðum við úrvinnslu þessa máls.
5. Uppbygging nýs frístundasvæðis í sveitarfélaginu - tillaga frá Ragnheiði Hergeirsdóttur og Gylfa Þorkelssyni, S-lista.
Bæjarstjórn samþykkir að halda áfram undirbúningi að uppbyggingu nýs frístundasvæðis í sveitarfélaginu og stefnir að því að ljúka deiliskipulagningu þess á næsta ári. Bæjarstjórn samþykkir að gera ráð fyrir kostnaði við verkefnið á fjárhagsáætlun ársins 2007 og jafnframt að falla frá hugmyndum um stórfellda mannvirkjagerð við Sundhöll Selfoss og á íþróttavallarsvæðinu við Engjaveg. Þar verði hins vegar gert ráð fyrir eðlilegu viðhaldi og endurbótum.
Greinargerð
Þó nokkur kostnaður hefur þegar verið lagður í undirbúning svæðis við Selfossflugvöll undir deiliskipulagningu í þessu skyni undanfarin tæp tvö ár og því fé væri kastað á glæ ef horfið yrði frá þeim hugmyndum nú. Umrætt svæði er nógu rúmt til að geta þjónað sveitarfélaginu til mjög langs tíma og þar eru tækifæri fyrir sveitarfélagið að taka forystu á landsvísu með samþættingu íþróttastarfsemi, afþreyingu og útivist fyrir íbúana, unga sem aldna, sem og ferðaþjónustu og atvinnustarfsemi af fjölbreyttum toga.
Rekstur íþrótta- og tómstundastarfsemi, og mannvirkja tengdum henni, er þungur baggi á sjóðum sveitarfélaganna. Hagur af því
