Athugið

Bæjarstjórnarfundur í beinni útsendingu

Fundargerðir

Til baka Prenta
Skipulagsnefnd - 52

Haldinn að Austurvegi 67, Selfossi,
05.11.2025 og hófst hann kl. 08:15
Fundinn sátu: Ari B. Thorarensen formaður, D-lista,
Rebekka Guðmundsdóttir nefndarmaður, D-lista,
Axel Sigurðsson nefndarmaður, Á-lista,
Matthías Bjarnason nefndarmaður, B-lista,
Viktor Stefán Pálsson varamaður, S-lista,
Ásdís Styrmisdóttir fulltrúi á skipulags- og byggingarsviði, Sölvi Leví Gunnarsson aðstoðarbyggingafulltrúi, Vigfús Þór Hróbjartsson skipulagsfulltrúi.
Fundargerð ritaði: Ari B Thorarensen, formaður skipulagsnefndar


Dagskrá: 
Almenn afgreiðslumál
1. 2301178 - Deiliskipulag hesthúsasvæðis - Hestamannafélagið Sleipnir
Lögð er fram eftir auglýsingu tillaga nýs deiliskipulags sem tekur til hesthúsasvæðisins á Selfossi. „Meginmarkmið deiliskipulagsins er að setja fram heildstæða stefnu fyrir allt hesthúsahverfið, bæði núverandi svæði og stækkun þess til suðurs. Deiliskipulagið byggir í megindráttum á núverandi fyrirkomulagi með áherslu á bættar reiðleiðir og þjálfunarsvæði. Á svæði til suðurs verður gert ráð fyrir nýjum lóðum og þannig fjölgar notendum innan hesthúsasvæðisins. Kröfur um bættan aðbúnað hesta og manna hafa aukist á undanförnum árum og munu skilmálar um byggingu nýrra húsa og breytingar á eldri húsum taka mið af því. Deiliskipulagið nær til alls hesthúsahverfisins, sem er núverandi keppnis- og, hesthúsasvæði og stækkaðs hesthúsasvæðis, samtals um 27 ha. Deiliskipulagsmörkin ná einnig yfir hluta af opnu svæði milli Langholts og hesthúsahverfis vegna fyrirhugaðs reiðstígs þar. Stækkun núverandi svæðis er um 7 ha að stærð. Á nýja svæðinu næst Dísastaðarlandi er gert ráð fyrir 19 nýjum hesthúsum meðfram Bæjartröð. Lóðir eru af þremur stærðum, og er gert ráð fyrir að innan þeirra verði heimilt að byggja stakstæð hús eða parhús. Hestagerði eru staðsett sunnan við hús beggja megin götu til að tryggja sól og skjól frá ríkjandi vindáttum. Auk 19 hefðbundinna hesthúsa er gert ráð fyrir tveimur stærri lóðum fyrir hesthús með litlum reiðskemmum. Skilmálar eru settir fyrir byggingu nýrra hesthúsa og eins eru settir fram skilmálar um mögulega endurbyggingu eldri húsa. Byggingarmagn á keppnissvæði er aukið umtalsvert, bæði fyrir fipo-keppnishöll en einnig fyrir minni hús til þjálfunar og fyrir áhorfendastúkur. Deiliskipulagið er í samræmi við Aðalskipulag Árborgar 2020-2036, þar sem svæðið er með landnotkunina ÍÞ2. Með gildistöku þessa deiliskipulags falla allar eldri skipulagsáætlanir fyrir svæðið úr gildi. „
Umsagnir bárust frá Brunavörnum Árnessýslu, Heilbrigðiseftirliti Suðurlands, Náttúruverndarstofnun og Vegagerðinni. Þá barst nokkur fjöldi athugasemda frá íbúum í næsta nágrenni við hesthúsahverfið, og einnig frá fyrrverandi landaeiganda hesthúsasvæðis og núverandi uppbyggingaraðila íbúðasvæðis á aðliggjandi landi, auk skipulagsnefndar hestamannafélagsins Sleipnis.
Helstu athugasemdir varða, nálægð svæðis við væntanlega íbúðabyggð, auk þess sem lýst er yfir áhyggjum af lyktarmengun.
Að mati skipulagsnefndar hefur verið brugðist við þeim umsögnum sem bárust vegna málsins með fullnægjandi hætti innan tillögunnar og í samantekt athugasemda og svara við innsendum umsögnum. Að mati nefndarinnar er tillagan í takt við heimildir aðalskipulags sveitarfélags þar sem svæðið er skilgreint sem hesthúsasvæði ÍÞ2. Aðliggjandi landeigendum og lóðarhöfum hafi mátt vera ljós skilgreining svæðisins innan núgildandi og eldra aðalskipulags sveitarfélagsins. Bendir nefndin á að innan deiliskipulags fyrir Austurbyggð II er vísað er til eldra aðalskipulags þar sem svæðið er merkt Ú11 og Ú13. Innan greinargerðar aðliggjandi deiliskipulags er enn fremur vísað til þess að skilgreind íbúðarbyggð liggi sunnan hesthúsahverfisins og að gengið verði á viðkomandi opið svæði til sérstakra nota fyrir hesthúsasvæði til að stækka íbúðarsvæðið. Hlutaðeigandi landeiganda aðliggjandi lands var því vel ljóst um fyrirhugaða notkun svæðisins þegar lagt var fram deiliskipulags sem tekur til íbúðarbyggðar ÍB13. Ekkert í stefnumörkun aðalskipulags sveitarfélagsins gefur til kynna að viðkomandi svæði sé víkjandi eða að önnur landnotkun en hesthúsasvæði sé áætlað innan viðkomandi svæðis. Þetta hafi landeiganda, lóðarhöfum og íbúðareigendum innan deiliskipulagssvæði Austurbyggðar II mátt vera það ljóst við skipulagningu og gildistöku deiliskipulags viðkomandi íbúðarbyggðar sem liggur að hesthúsasvæðinu. Auk þess bendir nefndin á að með gildistöku deiliskipulags er útbúið verkfæri til að bæta úr ýmsum aðstöðumálum innan svæðins s.s. er varðar frágang taðþróa, lausafjármuni innan svæðisins, uppbyggingu grunninnviða o.s.fr. Mælist nefndin til þess við bæjarstjórn Árborgar að deiliskipulagið taki gildi með birtingu auglýsingar í B-deild Stjórnartíðinda að lokinni yfirferð Skipulagsstofnunar í samræmi við 42. gr. skipulagslaga nr. 123/2010.
Samþykkt með 3 atkvæðum af 5.

Matthías Bjarnason sat hjá við afgreiðslu málsins og lagði fram eftirfarandi bókun:
Ég geri ekki athugasemd við skipulagstillöguna sem slíka. Hún er í samræmi við gildandi aðalskipulag og unnin af vanda. Þónokkrar athugasemdir hafa borist frá íbúum, einkum vegna nálægðar hesthúsasvæðisins við íbúðabyggð. Það þarf þó að hafa það í huga að hestamennska hefur verið stunduð á þessu svæði um langt skeið, þar er nú þegar hesthúsabyggð og glæsilegt íþrótta- og keppnissvæði í nálægð við íbúðabyggð. Íbúðum á Selfossi hefur fjölgað og með árunum færðist íbúðabyggð nær og nær hesthúsasvæðinu. Í aðalskipulagi hefur lengi verið gert ráð fyrir stækkun svæðisins og eðlilegt að Sleipnir ráðist í þessa vinnu.
Það blasir við að svæðið er farið að nálgast þolmörk, ef það hefur ekki þegar gert það. Reiðstígar eru af skornum skammti og í mikilli nálægð við þungaflutninga, íbúðir, umferð og iðnað. Svæðið er aðþrengt og möguleikar til frekari uppbyggingar þar eru mjög takmarkaðir, nema ef til kæmi að byggt yrði upp Flóahrepps megin við Gaulverjabæjarveg og Flóahreppur kæmi að skipulagi þess svæðis.
Lengi hefur verið til umræðu hvort færa mætti hesthúsasvæðið á nýjan stað utan þéttbýlis, þar sem möguleikar til uppbyggingar svæðis og reiðleiða væru margfalt meiri til framtíðar. Önnur sveitarfélög hafa farið þá leið með góðum árangri. Hestamannafélagið þjónustar einnig stærra svæði en Árborg eitt og sér, enda eru margir félagsmenn í Sleipni búsettir í Flóahreppi. Mögulega væri hægt að skoða framtíðaruppbyggingu á núverandi svæði í samstarfi við Flóhrepp.
Ég tel það bæði skynsamlegt og í raun nauðsynlegt að horfa á heildarmyndina og kanna hvort hægt sé að finna framtíðarlausn sem er vænlegri til lengri tíma. Ég skora á sveitarfélagið, hestamannafélagið og aðra hagsmunaaðila að hefja þá vinnu og kanna til hlítar hvaða leiðir eru í boði.

Viktor Stefán Pálsson situr einnig hjá við afgreiðslu málsins og tekur undir framlagða bókun Matthíasar.
Samþykkt
2. 2505050 - Miðtún 15-15a - Deiliskipulagsbreyting
Lögð er fram beiðni um deiliskipulagsbreytingu sem tekur til lóðar Miðtúns 15-15a. Í breytingunni felst að lóðirnar eru sameinaðar í eina innan deiliskipulags. Gert er ráð fyrir að heimilt verði að byggja fjögurra íbúða raðhús á lóðinni. Samhliða er gert ráð fyrir að hámarkshæð húsanna verði lækkum úr 8 m í 5.9 m og að hámarks byggingarmagn verði minnkað úr 678 fm í 520 fm.
Skipulagsnefnd mælist til þess við bæjarstjórn að viðkomandi breyting á deiliskipulagi svæðisins verði samþykkt. Málið fái málsmeðferð á grundvelli 1. mgr. 43. gr. skipulagslaga nr. 123/2010 er varðar breytingar á deiliskipulagi og verði sérstaklega kynnt aðliggjandi lóðarhöfum á svæðinu.
Samþykkt
3. 2506399 - Tryggvagata 36 - Deiliskipulagsbreyting
Bæjarstjórn Árborgar samþykkti á fundi sínum 17.9.2025, til kynningar og umsagnar skv. 40. gr. skipulagalaga nr.123/2010, tillögu að deiliskipulagsbreytingu vegna lóðarinnar Tryggvagata 36, á Selfossi. Tillagan var í kynningu frá 25.9.2025 til og með 17.10.2025.
„Tillaga deiliskipulagsbreytingar tekur til lóðar Tryggvagötu 36. Í breytingunni felst breytt notkun á svæðinu úr leikskóla í íbúðarhúsnæði. Skilgreindir eru byggingareitir, hæðir húsa, hámarksbyggingarmagn, svæði undir bílastæði á lóð og nýr göngustígur sem liggur með fram lóðinni. Lóðamörk eru óbreytt. Gert er ráð fyrir einu 3ja hæða íbúðarhúsi ásamt skýli fyrir hjóla- og sorpgeymslu á lóðinni. Ekki er gert ráð fyrir kjallara undir húsum. Þriðja hæð íbúðarhússins skal vera inndregin a.m.k. um 3 m á langhlið og 2 m á skammhliðar. Heildarfjöldi íbúða í húsinu geta orðið allt að 40. Heildarbyggingarmagn er að hámarki 3.000 m2 og nýtingarhlutfall er um 0,97. „
Athugasemdir bárust frá íbúum við Sigtún 31 og 34, auk íbúa við Tryggvagötu nr. 32 og 34. Þá barst ein athugasemd frá Skólameistara Fjölbrautaskóla Suðurlands. Við afgreiðslu málsins eftir forkynningu eru lagðar fram tvær uppfærðar tillögur sem gera annarsvegar ráð fyrir tilfærslu hússins um tvo metra til austurs og hinsvegar sem tekur til færslu á bílastæði hússins á vastur helming lóðarinnar.

Að mati skipulagsnefndar þarf að bregðast ítarlegar við þeim athugasemdum sem bárust við forkynningu tillögunnar með enn frekari minnkun á byggingarmagni innan lóðarinnar. Mælist nefndin til þess við bæjarstjórn að afgreiðslu málsins verði frestað og að unnið verði að nýju samkomulagi við lóðarhafa er varðar byggingarmagn innan lóðar og viðeigandi uppfærslu á skipulagstillögu til að lágmarka áhrif á aðliggjandi lóðarhafa.
Frestað
4. 2503333 - Skátafélagið Fossbúar - Deiliskipulag - Félags- og útivistarsvæði
Bæjarstjórn Árborgar samþykkti á fundi sínum 17.9.2025, til kynningar og umsagnar skv. 40. gr. skipulagalaga nr.123/2010, tillögu að deiliskipulagi vegna hluta opins svæðis OP1 við Tryggvagötu, sunnan Lóurima og norðan við Sunnulækjarskóla. Tillagan var í kynningu frá 25.9.2025, til og með 17.10.2025. Í deiliskipulaginu felst afmörkun útivistarsvæðis sem Skátafélagið Fossbúar munu hafa til afnota. Innan tillögunnar er afmarkað svæði þar sem gert er ráð fyrir uppbyggingu húsnæðis sem hýsir skátastarf í Árborg auk þess sem afmarkað er útivistarsvæði sem nýtist jafnt sem opið svæði fyrir almenning og starfsemi skátafélagsins. Markið tillögunnar er m.a. að nýta þá innviði sem svæðið hefur upp á að bjóða eins og bílastæði og gönguleiðir. Nýta þann gróður sem fyrir er og efla hann til muna með gróðursetningu nýrra plantna. Koma fyrir svæði sem nýtast má skólabörnum yfir veturinn til leikja og fræðslu. Koma fyrir litlum opnum húsum sem hýsa grillaðstöðu og fyrir útikennslu barna auk þess sem gert er ráð fyrir góðri tengingu við önnur opin svæði í næsta nágrenni.Engar athugasemdir eða ábendingar bárust á kynningartíma tillögunnar.
Skipulagsnefnd Árborgar mælist til þess við bæjarstjórn Árborgar að deiliskipulagið verði samþykkt og að það verði auglýst á grundvelli 41. gr. skipulagslaga nr. 123/2010 þar sem allar meginforsendur fyrir gerð deiliskipulagstillögunnar liggi fyrir innan aðalskipulags sveitarfélagsins. Næstu nágrönnum við tillöguna verði eftir sem áður kynnt tillagan sérstaklega við auglýsingu hennar.
Samþykkt
5. 2510347 - Deiliskipulagsbreyting - Byggðarhorn 54 (Litla Kot)
Lögð er fram tillaga að breytingu á deiliskipulagi búgarðabyggðar, Byggðarhorns Búgarðar. Breytingin nær til lóðar númer 54 sem hefur fengið heitið Litla Kot. Lóðinni verður skipt í tvær lóðir, Litla Kot I og Litla Kot II. Aðkoma að lóðum er frá hreimreið, sem tengjast Byggðarhornsvegi (3081) sem er héraðsvegur. Nú þegar er búið að byggja íbúðarhús á lóðinni og mun það tilheyra Litla Koti I. Á hvorri lóð fyrir sig er heimilt að byggja íbúðarhús og útihús. Heildarbyggingarmagn lóðar fyrir breytingu er 800 m2 fyrir íbúðarhús og 1200 m2 fyrir útihús og verður samanlagt heildarbyggingarmagn beggja lóða eftir breytingu 800 m2 fyrir ibúðarhús og 1000 m2 fyrir útihús.
Skipulagsnefnd mælist til þess að viðkomandi breyting á deiliskipulagi svæðisins verði samþykkt. Málið fái málsmeðferð á grundvelli 1. mgr. 43. gr. skipulagslaga nr. 123/2010 er varðar breytingar á deiliskipulagi og verði sérstaklega kynnt aðliggjandi lóðarhöfum á svæðinu auk þess sem leitað verði umsagna.
Samþykkt
6. 2510116 - Búðarstígur 8 - Breyting úr einbýlishúsi í parhús
Erindi frá eigendum Búðarstígs 8 á Eyrarbakka er hér með lagt fram til skipulagsnefndar. Óskað er eftir að skipta húsinu í tvær íbúðir, þ.e. parhús, með tveimur fasteignanúmerum.

Skipulagsnefnd Árborgar telur ekki forsendur fyrir því að veita heimild fyrir breytingu á einbýlishúsi í parhús með uppskiptingu hússins í tvær fasteignir.
Hafnað
7. 2510242 - Merkjalýsing - Nabbi
Lögð er fram merkjalýsing fyrir fjórar lóðir sem til stendur að stofna úr jörðinni Nabbi L166201. Lóðirnar munu fá heitið Nabbi 4, Nabbi 5, Nabbavík og Nabbanes. Afmörkun lóðar Nabbi 3 L232497 breytist einnig.
Skipulagsnefnd gerir athugasemdir við uppskiptingu landsins í takt við framlagða merkjalýsingu á grundvelli stefnumörkunar aðalskipulags Árborgar 2020-2036 þar sem svæðið er skilgreint sem landbúnaðarland í flokki II, gott ræktunarland. Þar er tilgreint að nýjar landspildur séu að jafnaði yfir 10 ha að stærð. Í stefnumörkun aðalskipulags segir að á landbúnaðarlandi sé heimilt er að byggja upp til fastrar búsetu, landbúnaðarstarfsemi og minniháttar atvinnustarfsemi, sem er jafnvel ótengd landbúnaði en að forðast skuli að raska samfellu í góðu landbúnaðarlandi með mannvirkjagerð. Forsenda uppskiptingu landsins með framlögðum hætti er að svæðið sé eftir atvikum skilgreint sem landbúnaðarsvæði L3 innan aðalskipulags eða að óskað sé eftir breytingu á landnotkun sé fyrirhuguð landnotkun landeigenda önnur en landbúnaður. Skipulagsnefnd frestar afgreiðslu málsins og felur skipulagsfulltrúa að annast samskipti við málsaðila.
Frestað
8. 2510410 - Smáratún 1 - Fyrirspurn um breytta notkun húss (notkunarflokkur)
Erindi frá Siggi Kalla ehf. lagt fram til skipulagsnefndar. Um er að ræða hugleiðingar og væntingar um leyfi fyrir skammtíma leigu/gistingu að fasteigninni Smáratún 1 á Selfossi.
Að mati skipulagsnefndar hentar staðsetning hússins ásamt fjölda bílastæða ágætlega m.t.t. skammtímaútleigu íbúða til ferðamanna. Að mati nefndarinnar er þó nauðsynlegt að skilgreina með ítarlegri hætti um heimildir til útleigu íbúða á svæði M6 sem tekur til Eyravegar, Þóristúns, Smáratúns, Fosstúns og Sóltúns. Samkvæmt stefnurmörkun aðalskipulags er gert er ráð fyrir lágreistri íbúðarbyggð á 1-3 hæðum og að heimilt sé að vera með verslun og þjónustu á jarðhæðum. Framlögð fyrirspurn er því ekki í takt við heimildir aðalskipulags að mati skipulagsnefndar. Mælist nefndin til þess að framlagðri fyrirspurn verði frestað, skipulagsfulltrúa falið að vinna að breytingu á stefnumörkun aðalskipulags.

Frestað
9. 2510247 - Umsagnarbeiðni - starfsleyfi fyrir Byggðarhorn 5C vegna gistingar í flokki II
Erindi frá fundi byggingarfulltrúa 29.10.2025 vísað til yfirferðar og umræðu innan skipulagsnefndar.
„Heilbrigðiseftirlit Suðurlands óskar umsagnar vegna umsóknar Guðbjargar Ágústu Sigurðardóttur um starfsleyfi fyrir gistinga í flokki II, Tegund: C - minna gistiheimili. Heiti staðar: Byggðarhorn 5c, Byggðarhorn Búgarður 5C 801 Selfossi F2524339, rýmisnúmer 01 0101 og hámarksfjöldi gesta er 7“ Lagt fyrir skipulagsnefnd vegna spurninga um samræmi við skipulagsáætlanir sveitarfélagsins.

Innan deiliskipulags að byggðarhorni er fjallað um heimildir ábúenda á svæðinu til að stunda ýmisskonar rekstur innan svæðisins s.s. bændagistingu. Að mati skipulagsnefndar samræmist útleiga á stöku íbúðarhúsi innan lóðar 5C, án þess að nokkur hafi á lóðinni skráða búsetu, ekki stefnumörkun eða markmiðum deiliskipulagsins eða landntokunar svæðisins í aðalskipulagi þar sem svæðið er skilgreint sem landbúnaðarsvæði. Megin landnotkun viðkomandi lóðar getur seint talist til landbúnaðar eða búgarðanotkunar sé eingöngu eitt íbúðarhús í skammtíma útleigu innan lóðarinnar. Þá telst hún frekar til verslunar- og þjónustusvæðis að mati nefndarinnar. Mælist nefndin til þess að með embætti skipulags- og byggingarfulltrúa komi á framfæri neikvæðri umsögn er varðar útgáfu rekstrar- og/eða starfsleyfis vegna fyrirhugaðrar starfsemi.
Hafnað
10. 2510231 - Rekstrarleyfisumsögn - fyrir gistingu í flokki II - Byggðarhorn 5C
Lögð er fram umsagnarbeiðni sem tekur til útgáfu rekstrarleyfis fyrir gistingu í flokki II, tegund C - minna gistiheimili. Afgreiðsla þessi tekur einnig til máls 2510247 sem er umsagnarbeiðni vegna útgáfu starfsleyfis fyrir sömu starfsemi. Um er að ræða stakt íbúðarhús á lóð Byggðarhorns 5C L234764. Gert er ráð fyrir útleigu hússins í heild sinni. Lagt fyrir skipulagsnefnd vegna spurninga um samræmi við skipulagsáætlanir sveitarfélagsins.
Innan deiliskipulags að byggðarhorni er fjallað um heimildir ábúenda á svæðinu til að stunda ýmisskonar rekstur innan svæðisins s.s. bændagistingu. Að mati skipulagsnefndar samræmist útleiga á stöku íbúðarhúsi innan lóðar 5C, án þess að nokkur hafi á lóðinni skráða búsetu, ekki stefnumörkun eða markmiðum deiliskipulagsins eða landntokunar svæðisins í aðalskipulagi þar sem svæðið er skilgreint sem landbúnaðarsvæði. Megin landnotkun viðkomandi lóðar getur seint talist til landbúnaðar eða búgarðanotkunar sé eingöngu eitt íbúðarhús í skammtíma útleigu innan lóðarinnar. Þá telst hún frekar til verslunar- og þjónustusvæðis að mati nefndarinnar. Mælist nefndin til þess að með embætti skipulags- og byggingarfulltrúa komi á framfæri neikvæðri umsögn er varðar útgáfu rekstrar- og/eða starfsleyfis vegna fyrirhugaðrar starfsemi.
Hafnað
11. 2511007 - Austurbyggð II; Skilgreining göngustíga; Óveruleg deiliskipulagsbreyting
Lögð er fram tillaga óverulegrar breytingar á deiliskipulagi sem tekur til Austurbyggðar II. Í breytingunni felst að skipulagssvæðið er stækkað til suðvestur og suðausturs til að ná utan um nýja göngustíga sem tengjast hverfinu.
Skipulagsnefnd mælist til þess viðkomandi breytingu á deiliskipulagi svæðisins verði samþykkt. Málið fái málsmeðferð á grundvelli 2. mgr. 43. gr. skipulagslaga nr. 123/2010 er varðar óverulega breytingu á deiliskipulagi. Þar sem engir aðrir hagsmunaaðilar eru innan svæðisins en umsækjandi er ekki talin þörf á grenndarkynningu. Skipulagsfulltrúa falið að ljúka málinu.
Samþykkt
12. 2511054 - Búrfellshólmi, Búrfell - nýtt efnistökusvæði - Askbr. - umsögn
Lögð er fram skipulagstillaga vegna breytingar á aðalskipulagi Skeiða- og Gjúpverjahrepps 2017-2029, tekur til skilgreiningar á nýju efnistökusvæði á Búrfellshólmum austan Búrfells. Svæðið er í beinu framhaldi af núverandi efnistökusvæði E33. Áætluð efnistaka er allt að 4,5 milljón m3 og að efnisnám nemi um 80.000-300.000 m3 á ári í 10-15 ár. Stærð svæðis er 189 ha. Um er að ræða vikurnámu og er vikurinn einkum unninn til útflutnings. Starfsemi á nýju efnistökusvæði verður að öllum líkindum unnin á sambærilegan hátt og áður hefur verið á Búrfellshólmum og gengið verði frá því svæði þar sem efnistöku er lokið jafnóðum. Álit Skipulagsstofnunar vegna umhverfismats liggur fyrir.
Skipulagsnefnd vill koma á framfæri athugasemdum er varðar hugsanlega flutningsleið þess efnis sem framlögð aðalskipulagsbreyting vegna skilgreiningar á nýju efnistökusvæði á Búrfellshólma austan Búrfells tekur til. Í umhverfismatsskýrslu sem tekur til framkvæmdarinnar er fjallað um flutningsleið fyrirhugaðra efnisflutninga frá viðkomandi efnistökusvæði þar sem segir að flutningabílar keyri frá námunni á Þjórsárdalsvegi (32) og Skeiða-og Hrunamannavegi (30) niður á Hringveg (1). Þaðan keyra þeir í gegnum Selfoss og niður til Þorlákshafnar á Eyrarbakkavegi (34) og Þorlákshafnarvegi (38), meðfram sjónum á Suðurstrandarvegi (427) og loks að námunni á Krýsuvíkurvegi (42). Skipulagsnefnd mælist eindregið til þess við bæjarstjórn og Vegagerðina sem núverandi veghaldara að Austurvegi og Eyravegi að fyrirhuguðum efnisflutningum um þéttbýlið á Selfossi verði mótmælt. Framlögð aðalskipulagsbreyting tekur reynar ekki sérstaklega á fyrirhuguðum flutningsleiðum vegna viðkomandi efnisflutninga. Nefnin mælist því til þess við sveitarstjórn Skeiða- og Gnúpverjahrepps að við umsókn um framkvæmdaleyfi vegna téðrar efnistöku á grundvelli viðkomandi aðalskipulagsbreytingar verði sérstaklega leitað umsagnar sveitarfélagsins Árborgar vegna flutningsleiða sem áætlaðar eru um þéttbýlið samkvæmt umhverfismatsskýrslu. Skipulagsnefnd lítur svo á að Austurvegur og Eyravegur né aðrir innanbæjarvegir á Selfossi séu götur sem ekki eru ætlaðar til þungaflutninga þvert í gegnum þéttbýlið á Selfossi.
Til kynningar
Fundargerðir
13. 2510021F - Afgreiðslufundur byggingarfulltrúa - 162
Lögð er fram fundargerð afgreiðslufundar byggingarfulltrúa nr. 162 til kynningar.

Fleira ekki gert. Fundi slitið kl. 10:15 

Til baka Prenta

Eldri fundargerðir

Einnig er hægt að nálgast eldri fundargerðir.

Sjá eldri fundargerðir
Þetta vefsvæði byggir á Eplica