Sveitarstjórnarkosningar 2026

Athugið

Bæjarstjórnarfundur í beinni útsendingu

Fundargerðir

Til baka Prenta
Bæjarstjórn - 71

Haldinn í Grænumörk 5, Selfossi,
25.03.2026 og hófst hann kl. 16:00
Fundinn sátu: Kjartan Björnsson forseti bæjarstjórnar,
Bragi Bjarnason bæjarfulltrúi, D-lista,
Ari B. Thorarensen varamaður, D-lista,
Sveinn Ægir Birgisson bæjarfulltrúi, D-lista,
Brynhildur Jónsdóttir varaforseti bæjarstjórnar,
Þórhildur Dröfn Ingvadóttir varamaður, D-lista,
Arna Ír Gunnarsdóttir bæjarfulltrúi, S-lista,
Sigurjón Vídalín Guðmundsson bæjarfulltrúi, S-lista,
Arnar Freyr Ólafsson bæjarfulltrúi, B-lista,
Ellý Tómasdóttir bæjarfulltrúi, B-lista,
Álfheiður Eymarsdóttir bæjarfulltrúi, Á-lista,
Rósa Sif Jónsdóttir ritari.
Fundargerð ritaði: Rósa Sif Jónsdóttir, ritari
Í upphafi fundar kallar forseti eftir athugasemdum við útsent fundarboð. Engar athugasemdir eru gerðar.


Dagskrá: 
Almenn erindi
1. 2503078 - Erindisbréf samráðshóps um málefni fatlaðs fólks í Sveitarfélaginu Árborg
Velferðarnefnd samþykkti fyrir sitt leyti á fundi 6. mars 2025 erindisbréf samráðshóps um málefni fatlaðs fólks og lagði til við bæjarráð að hópurinn yrði stofnaður. Velferðarnefnd lagði enn fremur til að sveitarfélagið segði sig frá þátttöku í starfandi notendaráði á vegum Bergrisans bs.

Á 121. fundi bæjarráðs sem haldinn var 21. mars 2025 lagði bæjarráð til við bæjarstjórn að samþykkja erindisbréf hópsins, að kjósa formann samráðshópsins og samþykkja að Sveitarfélagið Árborg segi sig frá þátttöku í starfandi notendaráði á vegum Bergrisans bs.

Fulltrúar í samráðshópnum eru:
Helga Lind Pálsdóttir D-lista, aðalmaður
Sveinn Ægir Birgisson D-lista, aðalmaður
Ellý Tómasdóttir B-lista, aðalmaður
Brynhildur Jónsdóttir D-lista, varamaður
Kjartan Björnsson D-lista, varamaður
Arna Ír Gunnarsdóttir S-lista, varamaður

Lagt er til við bæjarstjórn að samþykkja að Sveitarfélagið Árborg segi sig frá þátttöku í starfandi notendaráði á vegum Bergrisans bs.

Lagt er til við bæjarstjórna að samþykkja erindisbréf hópsins og kjósa formann samráðshópsins.
Bragi Bjarnason, D-lista, Arna Ír Gunnarsdóttir, S-lista og Ellý Tómasdóttir, B-lista, taka til máls.

Bæjarstjórn samþykkir samhljóða með 11 atkvæðu að Árborg segi sig frá þátttöku í starfandi notendaráði á vegum Bergrisans bs.

Bæjarstjórn samþykkir samhljóða með 11 atkvæðum erindisbréf hópsins og að Helga Lind Pálsdóttir verði formaður.
Lokaeintak erindisbréf fyrir samráðshóp í málefnum fatlaðs fólks í Árborg.pdf
2. 2507008 - Aðalskipulag Árborgar 2020-2036 - Breyting svæði M10 (Tryggvagata)
Tillaga frá 50. fundi skipulagsnefndar frá 10. september 2025, liður 1. Aðalskipulag Árborgar 2020-2036 - Breyting svæði M10 (Tryggvagata).

Lögð er fram uppfærð tillaga vegna óverulegrar breytingar á Aðalskipulagi Árborgar 2020-2036, eftir athugasemdir innan afgreiðslu Skipulagsstofnunar dags. 21.8.2025. Tillagan var tekin fyrir á fundi skipulagsnefndar 9.7.2025 og í Bæjarráði 10.7.2025. Niðurstaða Bæjarráðs var auglýst í Lögbirtingablaði og Dagskránni ásamt heimasíðu Árborgar þann 17.7.2025.
Skipulagsstofnun gat ekki fallist á að um óverulega breytingu væri að ræða þar sem tillagan gerði ráð fyrir að heildarfjöldi íbúða væri aukinn úr 20-40 í 80 íbúðir. Uppfærð tillaga gerir ráð fyrir að heimild sé fyrir allt að 45 íbúðum í stað 20-40 íbúða.

Skipulagsnefnd Árborgar mælist til þess við bæjarstjórn að samþykkja viðkomandi breytingu á aðalskipulagi sveitarfélagsins sem óverulega breytingu á grundvelli framlagðs rökstuðnings. Málið fái málsmeðferð á grundvelli 2. mgr. 36. gr. skipulagslaga nr. 123/2010 er varðar óverulega breytingu á aðalskipulagi. Niðurstaða sveitarfélagsins verði auglýst á opinberum vettvangi og senda að nýju til samþykktar hjá Skipulagsstofnun.
Ari Björn Thorarensen, D-lista og Bragi Bjarnason, D-lista, taka til máls.

Bæjarstjórn samþykkir samhljóða með 11 atkvæðum breytingu á svæði M10 (Tryggvagata) í aðalskipulagi Árborgar 2020-2036, með vísan til 2. mgr. 36. gr. skipulagslaga nr. 123/2010, í samræmi við tillögu skipulagsnefndar Árborgar, en um óverulega breytingu er að ræða. Breytingarnar fela í sér að fallið verði frá því að kröfur séu settar um stúdentaíbúðir og verslanir á jarðhæð bygginganna auk þess sem fjöldi íbúða er aukinn um 5 íbúðir, úr 40 í 45.
Bæjarstjórn felur skipulagsfulltrúa að auglýsa breytinguna og senda að nýju til samþykktar hjá Skipulagsstofnun.
112930 Gátlisti Tryggvagata M10.pdf
112930-01-GRG-V01-Tryggvagata M10.pdf
3. 2601204 - Jórvík 1 - Deiliskipulagsbreyting
Tillaga frá 58. fundi skipulagsnefndar frá 11. mars sl. liður 3. Jórvík 1 - Deiliskipulagsbreyting.
Larsen hönnun leggur fram uppfærða tillögu breytinga á deiliskipulagi íbúðabyggðar í landi Jórvíkur I sem var frestað afgreiðslu á fundi nefndarinnar þann 25.2.2026. Markmið með deiliskipulagsbreytingu er að bæta nýtingu fjölbýlishúsalóða með fjölgun íbúða, stækkun á byggingareit, bilastæðum fækkað og hámarks vegg / mænishæð er hækkuð. Breytingar: Á fjölbýlishúsalóðum F2 er bílastæðum fækkað niður í 1 stæði á íbúð og hámarks vegg / mænishæð hækkar úr 8 m upp í 10 m.
Á lóðunum Fossvík 1, 3 og 5 eru byggingareitir stækkaðir og íbúðum fjölgað í samræmi. Á lóðinni Nýja Jórvík 13, er íbúðum fjölgað. Að öðru leiti gilda eldri samþykktir skilmálar. Nýja Jórvík 13 fjölgar úr 12 íbúðum í 20. Fossvík 1 fjölgar úr 8 íbúðum í 12. Fossvík 3 fjölgar úr 8 íbúðum í 16. Fossvík 5 fjölgar úr 8 íbúðum í 12. Fjölgun samtals úr 36 íbúðum í 62.
Skipulagsnefnd Árborgar mælist til þess við bæjarstjórn að viðkomandi breyting á deiliskipulagi svæðisins verði samþykkt. Málið fái málsmeðferð á grundvelli 1. mgr. 43. gr. skipulagslaga nr. 123/2010 er varðar breytingar á deiliskipulagi. Jafnframt mælist nefndin til þess að breytingin verði sérstaklega kynnt aðliggjandi lóðarhöfum innan hverfisins.
Ari Björn Thorarensen, D-lista, Arnar Freys Ólafsson, B-lista, Arna Ír Gunnarsdóttir, S-lista, Sveinn Ægir Birgisson, D-lista og Sigurjón Vídalín Guðmundsson, S-lista, taka til máls.

Bæjarstjórn samþykkir samhljóða með 11 atkvæðum breytingar á deiliskipulagi svæðisins, í samræmi við bókun frá 58. fundi skipulagsnefndar frá 11. mars sl. Jórvík 1 - Deiliskipulagsbreyting. Bæjarstjórn felur skipulagsfulltrúa að fara með málið í samræmi við 1. mgr. 43. gr. skipulagslaga nr. 123/2010 og kynna það sérstaklega aðliggjandi lóðarhöfum innan hverfisins.
Fossvík 1 - 2. hæð.pdf
Fossvík 1 - 1. hæð.pdf
Jórvík1 - breyting á deiliskipulagi 1 áfangi_2.pdf
4. 2603071 - Reglur um heimgreiðslur
Tillaga frá 163. fundi bæjarráðs frá 12. mars sl. liður Reglur um heimgreiðslur.

Lagðar eru fram tillögur að reglum um heimgreiðslur til foreldra vegna dagvistunar barna, gjaldskrá og minnisblaði sviðsstjóra fjölskyldusviðs, dags. 9. mars sl.
Heiða Ösp Kristjánsdóttir, sviðstjóri fjölskyldusviðs kemur inn á fundinn og fer yfir tillögur að nýjum reglum um heimgreiðslur til foreldra. Fram kemur að heimgreiðslurnar séu ætlaðar foreldrum barna á aldrinum 12-30 mánaða sem eru búsett í Svf. Árborg og ekki komin með pláss á leikskóla eða í öðru dagvistunarúrræði. Gert er ráð fyrir að reglurnar taki gildi frá og með 1. apríl 2026 og upphæð heimgreiðslu með hverju barni verði kr. 110.000- sem er greidd mánaðarlega eftirá í allt að 11 mánuði á ári, en ekki er greitt fyrir júlímánuð.

Bæjarráð samþykkir fyrir sitt leyti reglur um heimgreiðslur og vísar áfram til afgreiðslu í bæjarstjórn Árborgar. Bæjarráð vísar málinu einnig til umsagnar í velferðarnefnd og fræðslu- og frístundanefnd sem fylgi með til umræðu og afgreiðslu bæjarstjórnar.

Bæjaráð felur bæjarstjóra að undirbúa viðauka vegna aukins fjármagns í heimgreiðslur á árinu 2026, að fjárhæð kr. 5.000.000,- til samþykktar.

Lagt er til við bæjarstjórn að samþykkja reglur og gjaldskrá fyrir heimgreiðslur.
Bragi Bjarnason, D-lista, Arna Ír Gunnarsdóttir, S-lista, Sigurjón Vídalín Guðmundsson, S-lista, Þórhildur Dröfn Ingvadóttir, D-lista, Ellý Tómasdóttir, B-lista, Álfheiður Eymarsdóttir, Á-lista, Sveinn Ægir Birgisson, D-lista, Ari Björn Thorarensen, D-lista, Arnar Freyr Ólafsson, B-lista og Brynhildur Jónsdóttir, D-lista, taka til máls.

Bæjarstjórn samþykkir samhljóða með 11 atkvæðum reglurnar og gjaldskrá fyrir heimgreiðslur.

Fjármagn er til staðar í verkefnið fyrstu mánuði heimgreiðslna, viðauki verður lagður fram vegna verkefnisins á fundi bæjarstjórnar.

Ellý Tómasdóttir, B-lista, tekur til máls og leggur fram eftirfarandi bókun bæjarfulltrúa B-lista:
Framsókn í Árborg lagði ríka áherslu á heimgreiðslur í aðdraganda síðustu kosninga undir yfirskriftinni „Mætum fjölskyldunni“, með það að markmiði að brúa bilið milli fæðingarorlofs og leikskóla.

Við fögnum því að heimgreiðslur til foreldra ungra barna séu að verða að veruleika í sveitarfélaginu þó að það hefði mátt koma fyrr. Um er að ræða nauðsynlegt fyrsta skref í ljósi þess að ekki fækkar á biðlista eftir leikskólaplássi með fjölgun íbúa í sveitarfélaginu. Þetta er góð byrjun en það er enn langt í land.

Mikilvægt er að tryggja að úrræðið sé fjármagnað frá upphafi svo það veiti þann stuðning við barnafjölskyldur sem að er stefnt.

Framsókn leggur jafnframt áherslu á fjölgun leikskólaplássa í sveitarfélaginu. Sér í lagi í ljósi þess að plássum hjá dagforeldrum hefur fækkað á kjörtímabilinu. Að lokum leggjum við til að áfram verði unnið markvisst að eflingu leikskólastigsins þannig að börn komist fyrr inn í leikskóla.

Undir þetta rita
Ellý Tómasdóttir og Arnar Freyr Ólafsson bæjarfulltrúar B lista


Arna Ír Gunnarsdóttir, S-lista, tekur til máls og leggur fram eftirfarandi bókun bæjarfulltrúa S-lista:
Þessi tillaga frá meirihluta D- og Á-lista sýnir svo ekki verður um villst að það styttist í kosningar. Það er einkennilegt að tillaga um heimgreiðslur skyldi ekki koma fram í fjárhagsáætlunarvinnunni sl. haust og sett inn í fjárhagsáætlun ársins 2026 sem samþykkt var í desember sl. Það þykja ekki góðir stjórnsýsluhættir að þurfa að samþykkja viðauka við fjárhagsáætlun svo skömmu eftir að hún er samþykkt. Undirrituð hafa auk þess áhyggjur af því að áætlun um kostnað vegna heimgreiðslna sé allt of lág þar sem að það muni fleiri sækja um greiðslur heldur en gert er ráð fyrir í áætlun.

Svf. Árborg hefur því miður dregist verulega aftur úr nágrannasveitarfélögunum þar sem ekki er þörf á að bjóða upp á heimgreiðslur í dag því, þar eru í boði næg leikskólapláss og enginn biðlisti. Auk þess er farið að bjóða upp á gjaldfrjálsa leikskóla, ungu fólki munar aldeilis um minna.

Ungir foreldrar sem hafa lokið fæðingarorlofi sínu eru fæstir að biðja um heimgreiðslur, þeir þurfa að komast aftur til vinnu sinnar til þess að ná endum saman og geta staðið við skuldbindingar sínar. Heimgreiðslur eru ákveðin uppgjöf, plástur á sár en engin raunveruleg lausn á skorti á þjónustu við ungar barnafjölskyldur. Það er þó vissulega eilítil sárabót að þær fjölskyldur sem búa við mikla tekjuskerðingu vegna skorts á þjónustu, skuli fá smáræðis stuðning frá sveitarfélaginu.

Arna Ír Gunnarsdóttir bæjarfulltrúi S-lista
Sigurjón Vídalín Guðmundsson S-lista


Bragi Bjarnason, D-lista, tekur til máls og leggur fram eftirfarandi bókun bæjarfulltrúa D- og Á-lista:

Bæjarfulltrúar D- og Á-lista lýsa yfir ánægju með nýsamþykktar reglur um heimgreiðslur í Sveitarfélaginu Árborg. Heimgreiðslurnar auka valmöguleika foreldra ungra barna í samfélaginu sem kjósa að vera lengur heima með barni eða hafa ekki önnur dagvistunarúrræði áður en það fær leikskólapláss. Markmiðið er að áfram verði í boði dagvistunarúrræði hjá dagforeldrum en einnig að halda áfram fjölgun leikskólaplássa í Árborg.

Sveitarfélagið Árborg er með þessari ákvörðun að fylgja fordæmi fjölda sveitarfélaga sem bjóða upp á heimgreiðslur sem valmöguleika fyrir foreldra ungra barna, sem er jákvætt.

Til næstu ára er það síðan sameiginlegt verkefni ríkis og sveitarfélaga að brúa bilið milli fæðingarorlofs og leikskólavistar.
Bragi Bjarnason, D-lista
Álfheiður Eymarsdóttir, Á-lista
Kjartan Björnsson, D-lista
Sveinn Ægir Birgisson, D-lista
Brynhildur Jónsdóttir, D-lista
Þórhildur Dröfn Ingvadóttir, D-lista
Ari Björn Thorarensen, D-lista

Reglur um heimgreiðslur 9.pdf
Gjaldskrá heimgreiðslna.pdf
Bókun frá Velferðarnefndarfundi 17. mars..pdf
Bókun frá fræðslu- og frístundanefndarfundi 24. mars..pdf
5. 2205259 - Kosning í embætti og nefndir 2022 - 2026
Kosið er í eftirfarandi í nefndir, stjórnir og til að sækja aðalfundi og skal kosning gilda út kjörtímabilið 2022-2026. Aðalfundur Byggðasafns Árnesinga, tólf fulltrúar og tólf til vara skv. samþykktum. Aðalfundur Héraðsskjalasafns Árnesinga, tólf fulltrúar og tólf til vara skv. samþykktum og Listasafns Árnesinga, tólf fulltrúar og tólf til vara.
Lagt er til að fulltrúar Sveitarfélagsins Árborga á aðalfundum Byggðasafns Árnesinga, Héraðsskjalasafns Árnesinga og Listansafns Árnesinga verði:

Aðalmenn:
1 Bragi Bjarnason D-lista
2 Kjartan Björnsson D-lista
3 Sveinn Ægir Birgisson D-lista
4 Brynhildur Jónsdóttir D-lista
5 Þórhildur D. Ingvadóttir D-lista
6 Álfheiður Eymarsdóttir Á-lista
7 Helga Lind Pálsdóttir D-lista
8 Fjóla St. Kristinsdóttir D-lista
9 Arnar Freyr Ólafsson B-lista
10 Ellý Tómasdóttir B-lista
11 Arna Ír Gunnarsdóttir S-lista
12 Sigurjón Vídalín Guðmundsson S-lista

Varamenn:
1 Ari Thorarensen D-lista
2 Guðmundur Ármann Pétursson D-lista
3 Jóhann Jónsson D-lista
4 Björg Agnarsdóttir D-lista
5 Gísli Rúnar Gíslason D-lista
6 Axel Sigurðsson Á-lista
7 Ólafur Ibsen Tómasson D-lista
8 Viðar Arason D-lista
9 Guðrún Rakel Svandísardóttir B-lista
10 Matthías Bjarnason B-lista
11 Björgvin G. Sigurðsson S-lista
12 Ástfríður M. Sigurðardóttir S-lista

Tillagan er borin undir atkvæði og samþykkt samhljóða með 11 atkvæðum.
Tillaga að fulltrúum á aðalfund Lista-, Byggða- og Héraðsskjalasafns..pdf
6. 2206157 - Fundartími bæjarstjórnar kjörtímabilið 2022-2026
Lagt er til að næsti fundur bæjarstjórnar verði miðvikudaginn 22. apríl.
Tillagan er borin undur atkvæði og samþykkt samhljóða með 11 atkvæðum.
Fundargerðir
7. 2602021F - Eigna- og veitunefnd - 52
52. fundur haldinn 24. febrúar.
8. 2602007F - Skipulagsnefnd - 57
57. fundur haldinn 25. febrúar.
9. 2602026F - Fræðslu- og frístundanefnd - 26
26. fundur haldinn 25. febrúar.
Brynhildur Jónsdóttir, D-lista og Sveinn Ægir Birgisson, D-lista, taka til máls undir lið 3. - Matsferil - upplýsingar um innleiðingu.
Brynhildur Jónsdóttir,-lista, tekur til máls undir lið 4. - Biðlistar í leikskólum 2026.
10. 2602034F - Bæjarráð - 162
162. fundur haldinn 5. mars.
11. 2603008F - Bæjarráð - 163
163. fundur haldinn 12. mars.
12. 2603006F - Skipulagsnefnd - 58
58. fundur haldinn 12. mars.
13. 2603015F - Bæjarráð - 164
164. fundur haldinn 19. mars.
Sveinn Ægir Birgisson, D-lista tekur til máls undir lið 1 - Vor í Árborg.


Fleira ekki gert. Fundi slitið kl. 17:30 

Til baka Prenta

Eldri fundargerðir

Einnig er hægt að nálgast eldri fundargerðir.

Sjá eldri fundargerðir
Þetta vefsvæði byggir á Eplica