Jól í Húsinu á Eyrarbakka
Byggðasafn Árnesinga býður upp á notalega jólastemningu á aðventunni. Upplestur rithöfunda og skálda, bókastund fyrir börn, jólaævintýri, hátíðleg jólalög og jólasýning Hússins. Jólaandinn verður á Eyrarbakka!
Skáldastund. Sunnudaginn 28. nóvember, klukkan 16:00, lesa höfundar úr nýútkomnum verkum sínum. Í ár heimsækja Húsið þau Harpa Rún Kristjánsdóttir, Einar Már Guðmundsson, Ólína Kjerúlf Þorvarðardóttir, Haukur Ingvarsson, Inga Kristjánsdóttir og Benedikt Jóhannsson.
Bókastund fyrir börnin! Laugardaginn 4. desember, klukkan 15:00, koma Bergrún Íris Sævarsdóttir og Gunnar Helgason í skemmtilega heimsókn. Við lofum fjörugum upplestri og fræðandi spjalli um bækur, lestur og teikningar.
Hátíðleg jólastemning. Sönghópurinn Lóurnar mætir laugardaginn 11. desember og syngur undurfögur jólalög og töfra fram sannkallaðan jólayl í hjörtum þeirra sem á hlýða. Tónleikarnir verða frá kl. 13:00 - 14:00.
Ævintýrið um Augastein. Jólaævintýrið dásamlega eftir Felix Bergsson verður aðgengilegt alla aðventuna á heimasíðu safnsins en jólasagan er í formi jóladagatals sem gaman er að sameinast um að fylgjast með á aðventunni. Sagan byggir á sögunum um sveinstaulana þrettán sem við þekkjum svo vel og í sögunni finnum við svarið við því af hverju börn hér á landi hafa mörg hver sett skó út í glugga rétt fyrir jól.
Jólasýning Byggðasafns Árnesinga verður opin frá 13:00 – 17.00 helgarnar 27. - 28. nóv., 4. - 5. des. og 11. - 12. des., aðgangur ókeypis.
Á öðrum tímum er opið eftir samkomulagi.
