45 ára afmæli Myndlistarfélagsins – 45 viðburðir í mars!
Það verður sannkölluð listaveisla á Suðurlandi í mars þegar félagið fagnar 45 ára afmæli sínu með heilum 45 sýningum og viðburðum víðsvegar um Suðurland.
Félagið var stofnað í mars árið 1981 af hópi áhugasamra listamanna sem vildu skapa vettvang fyrir myndlist og skapandi starf. Frá þeim tíma hefur félagið vaxið og dafnað og í dag er það öflugt samfélag listafólks með yfir 100 félagsmenn sem vinna í fjölbreyttum miðlum og stílum.
Til að halda upp á þennan áfanga ætlum við að gera vel við okkur með því að fylla marsmánuð af list. Á dagskránni eru fjölmargar sýningar, opnar vinnustofur, listaviðburðir, námskeið, kaffihittingar og fjölskylduvænir viðburðir. Viðburðirnir fara fram á ýmsum stöðum um Suðurland og gefa fólki tækifæri til að upplifa listina á fjölbreyttan hátt.
Markmiðið er einfalt:
Að fagna listinni, félaginu okkar og samfélaginu og bjóða sem flestum að taka þátt.
Við hvetjum alla til að kíkja á viðburði, skoða sýningar og njóta skapandi stemningar með okkur í mars. Flestir viðburðir eru ókeypis og opnir öllum, nema annað sé sérstaklega tekið fram (t.d. viðburðir eins og Málum & Skálum).
Fylgist með dagskránni á heimasíðu félagsins þar sem við kynnum alla 45 viðburðina sem fara fram í afmælismánuðinum.
Komið og fagnið listinni með okkur!
