Listasýning Sólheima | Bókasafn Árborgar, Selfossi
Leirlistaverk, vatnslitamyndir og þæfð ullarverk prýða bókasafn sveitarfélagsins á Selfossi í menningarmánuðinum.
Baldvin Jónsson (f. 1982) er listamaður frá Villingavatni í Grímsnes- og Grafningshreppi, sem hefur stundað myndlistarnám í Fjölbrautaskóla Suðurlands og á Sólheimum í Grímsnesi. Baldvin er mikill áhugamaður um myndasögur, manga teiknimyndir, fantasíur og tölvuleiki og sækir hann helst innblástur í þá myndheima. Baldvin er mjög fær, vandvirkur og nákvæmur myndlistarmaður sem gefur smáatriðum viðfanga sinna góðan gaum. Hann hefur gott lag á því að skapa skemmtilegar og vandaðar eftirmyndir fyrirmynda sinna. Listaverkin sem Baldvin sýnir í Bókasafni Árborgar eru bæði leirlistarverk og vatnslitamyndir.
Guðrún Jóna Ingvarsdóttir (f. 2001) er frá Hvolsvelli og lauk námi á starfsbraut Fjölbrautaskóla Suðurlands vorið 2021. Guðrún Jóna hefur lengi verið mjög listræn en er nýlega farin að leggja stund á myndlist á Sólheimum í Grímsnesi. Guðrún Jóna er hæfileikarík listakona, listaverk hennar eru ævintýraleg og oft fígúratív. Þau einkennast af sköpunargleði og litadýrð. Listaverkin eftir Guðrúnu Jónu sem eru til sýnis á bókasafni Árborgar, eru þæfð ullarverk sem Guðrún Jóna vann í listasmiðju Sólheima nú í sumar.