Vetrartónar | Nordic Affect ásamt Ian Wilson og Eyjólfi Eyjólfssyni
Tónleikarnir í Stokkseyrarkirkju verða fjölbreyttir en sérstök áhersla verður lögð á hinn merka tónlistararf strandarinnar.
Á öðrum tónleikum Vetrartóna, nýrrar tónleikaraðar við Stokkseyrarkirkju, kemur fram tónlistarhópurinn Nordic Affect og flytur tónlist sem hverfist um hafið, barokkverk og þjóðlög í bland.
Selshamur, fárviðri, hafballaða og margt fleira kemur við sögu en sérstakir gestir verða Ian Wilson blokkflautuleikari og Eyjólfur Eyjólfsson söngvari sem jafnframt leikur á langspil og hvannarflautu.
Aðangur er ókeypis og öll velkomin. Tekið verður við frjálsum framlögum í anddyri kirkjunnar. Tónleikarnir eru styrktir af Uppbyggingarsjóði Suðurlands.
Nordic Affect hefur komið sér á kortið sem framsækinn tónlistarhópur en hópurinn var stofnaður árið 2005. Gagnrýnendur innan lands og utan hafa hælt hópnum í hástert, m.a. fyrir ‘ineffable synergy between the performers' (San Francisco Classical Voice), lýst honum sem ‘multi-disciplinary force of nature' (A Closer Listen) og sem gersemi í íslensku tónlistarlífi (Fréttablaðið).
Nordic Affect hlaut tilnefningu til Tónlistarverðlauna Norðurlandaráðs árið 2013 og var valinn tónlistarhópur ársins innan sígildrar og samtímatónlistar á Íslensku tónlistarverðlaununum ári síðar. Nordic Affect hefur jafnframt verið útnefndur sem Tónlistarhópur Reykjavíkurborgar og var á árunum 2018-2020 staðarhópur Myrkra Músíkdaga.
Nordic Affect hefur frá stofnun 2005 komið fram á fjölda hátíða, þar á meðal TRANSIT Festival (BE), November Music (NL), Skaņu Mežs (LV), KLANG festival (DK), Ensems Festival (SP) og Estonian Music Days (EE). Hópurinn hefur jafnframt tvisvar haldið í tónleikaferð um Bandaríkin. Plötur Nordic Affect hafa verið gefnar út af Smekkleysu, Brilliant Classics, Musmap, Carrier Records, Sono Luminus og Øra Fonogram. Þær hafa hlotið frábæra dóma í erlendum tónlistarblöðum og m.a. ratað inn á lista yfir bestu plötur ársins hjá m.a. The Chicago Reader, 5:4, AnEarful, The Boston Globe, I Care if You Listen og The New Yorker.
Listrænn stjórnandi Nordic Affect er Halla Steinunn Stefánsdóttir.
Nordic Affect er styrkt af Tónlistarsjóði og Reykjavíkurborg
