Jólakvöld Leikfélags Selfoss
Hið árlega Jólakvöld Leikfélags Selfoss verður haldið þriðjudagskvöldið 16. desember kl. 20:00 í Litla Leikhúsinu við Sigtún.
Jólakvöldið verður róleg og heimilisleg stund þar sem fólk getur notið sín og nærveru annarra. Þar er kjörið að slaka á í jólaundirbúningnum, njóta augnabliksins og stemningarinnar á afslappaðan hátt í góðu og hlýju umhverfi leikhússins.
Góðir jólagestir og karakterar hafa kíkt í heimsókn á þessum kvöldum og í ár verða í það minnsta frumsýnd tvö lítil frumsamin jólaleikrit, hver veit hvað gerist meira.
Jólakvöldið er opinn vettvangur fyrir alla sem vilja leggja sitt af mörkum við að skapa góða jólastemmningu svo atriði hvers konar í anda jólanna eru velkomin. Ef þú lumar á einu slíku, góðri sögu, ljóði eða jafnvel lagi, þá væri það afar skemmtilegt. Gott væri ef viðkomandi gæti látið vita í tölvupósti á leikfelagselfoss@leikfelagselfoss.is eða í skilaboðum á facebooksíðu félagsins, Leikfélag Selfoss.
Það hefur skapast hefð fyrir því að fólk komi með smákökur eða annað góðgæti með sér og slái þannig saman í gott hlaðborð, en leikfélagið býður uppá kaffi og kakó.
Hlökkum til að njóta jólastemmningarinnar með ykkur, öll velkomin.
