Námskeið í módelteikningu og Masterclass í málun hjá Guðrúnu Tryggva
Í vetur býður Listrými upp á námskeið á sviði myndlistar en nú í janúar hefst fyrsta námskeiðið, námskeið í módelteikningu- og málun.
Námskeiðið er haldið helgina 18. og 19. janúar í sal Rauða krossins í Hvergerði
Fyrri daginn verður teiknað eftir lifandi módeli, bæði með blýanti, kolum og krít. Seinni daginn verður málað eftir módeli, með vatnsleysanlegum litum, t.d. vatnslitum og akríl, á pappír eða léreft. Stefnt að því að losa um hömlur og vinna frjálslega og persónulega með viðfangsefnið.
Verkfæri og pappír verður á staðnum.
Í febrúar verður Guðrún síðan með Masterclass í akríl- og olíumálun þar sem áherslan verður á að skoða efnafræðina og meta hvernig efnið hjálpar hugmyndinni sem unnið er með hverju sinni. Æfing í litablöndun og lagskiptri vinnu með akríl og olíu. Möguleikar beggja miðla kannaðir og virkjaðir.
Námskeið fyrir fólk sem hefur þegar málað eitthvað en vill verða öruggara í vinnubrögðum og aukið við kunnáttu sína við að tengja efnisnotkunina betur hugmyndinni sem unnið er út frá hverju sinni. Unnið er í þremur lotum og áfram heima inn á milli.
Auk þess verða haldin Örnámskeið um hin ýmsu svið myndlistarinnar auk lengri námskeiða s.s. Úr huga í efni, þar sem hugmyndaþróun er tekin föstum tökum og Portraitteikning- og mállun en nánari upplýsingar um námskeiðin er að finna á tryggvadottir.com.
Guðrún Arndís Tryggvadóttir er fædd í Reykjavík en hefur búið og starfað hér á Suðurlandi síðan 2006 en öll námskeiðin nema Módelteikning- og málun verða haldin á vinnustofu hennar á Selfossi. Guðrún nam við Myndlista- og handíða Íslands og fór síðan til framhaldsnáms til Parísar og síðan til München þar sem hún hlaut æðstu verðlaun akademíunnar við útskrift. Hún hefur rekið sinn eigin skóla með hléum frá 1993 og kennt bæði í öðrum skólum sem og á háskólastigi. Hún hefur hlotið fjölda verðlauna og viðurkenninga, bæði fyrir list sína og nýsköpun á sviði umhverfisfræðslu en hún tekur einnig að sér að halda fræðslufyrirlestra um myndlist fyrir félög og fyrirtæki.
Félag hennar Listrými er bæði útgáfu- og fræðslufélag og stéttarfélög hafa styrkt félaga sína til að taka þátt í námskeiðum hennar.
Allar nánari upplýsingar um námskeið Listrýmis veitir Guðrún í sima 863 5490 og á gudrun@tryggvadottir.com.
