Galdrar í tónlist vöktu mikla lukku meðal grunnskólanema
Líf og fjör ríkti í Stekkjaskóla í gær þegar Sinfóníuhljómsveit Suðurlands hélt skólatónleika fyrir grunnskólanemendur í Árborg og Flóaskóla. Tónleikarnir, sem báru yfirskriftina Galdrar í tónlist, buðu upp á ævintýralegt ferðalag inn í heim tónlistarinnar þar sem töfrandi tónlist, dularfull hljóð, galdrastafir, galdrasteinar og galdraþulur fengu meðal annars að njóta sín.
Tónleikarnir voru vel sóttir og sýndu nemendur mikinn áhuga og þátttöku. Í lok tónleikanna risu nemendur úr sætum sínum og sungu af krafti með hljómsveitinni lagið Af stað að hitta karlinn úr Galdrakarlinum í Oz. Nemendur höfðu æft lagið með kennurum sínum fyrir tónleikana og skapaðist því mikil stemning í salnum.
Skólatónleikar í sjöunda sinn á Suðurlandi
Þetta er í sjöunda sinn sem Sinfóníuhljómsveit Suðurlands býður grunnskólanemendum á Suðurlandi upp á sinfóníutónleika í heimabyggð. Slíkir viðburðir gegna mikilvægu hlutverki í menningaruppeldi barna og ungmenna.
Með því að færa tónlistina til nemenda fá þau tækifæri til að upplifa lifandi sinfóníutónlist á eigin forsendum, kynnast fjölbreyttum hljóðheimum og njóta menningarviðburða óháð búsetu.
Upplifun sem þessi eykur forvitni og skilning á listum og getur orðið kveikja að frekari þátttöku í tónlistar- og menningarlífi.
Sveitarfélagið Árborg þakkar Sinfóníuhljómsveit Suðurlands fyrir glæsilega tónleikadagskrá og dýrmætt framlag til menningarstarfs og listfræðslu á Suðurlandi. Tónleikarnir voru sannarlega feiknabýsnahrikagantagríðaryndislega fjörugir og skildu eftir sig bros á vör hjá ungum tónleikagestum.
