Heilsuefling 60+ í Árborg fer vel af stað
Mikill áhugi hefur verið á námskeiðinu Heilsuefling 60+ Í Árborg og hefur tímunum verið fjölgað í takt við eftirspurn og eru æfingar núna bæði kl 9:30 og 10:30 á þriðjudögum og fimmtudögum.
Námskeiðið er fyrir íbúa í Árborg 60 ára og eldri, þeim að kostnaðarlausu og er þáttur í verkefninu Heilsueflandi samfélag.
Í september hafa æfingarnar farið fram úti á frjálsíþróttavellinum og hefur mikill fjöldi fólks sótt æfingarnar þrátt fyrir ýmis veðurskilirði. Þann 5. október var fyrsta æfingin í nýja íþróttahúsinu við íþróttavöllinn á Selfossi þegar vel á annað hundrað manns mættu og ætlar hópurinn að halda ótrauður áfram þar í vetur að efla heilsuna. Aðstaðan frábær og staðsetning hússins er góð með íþróttasvæðið allt um kring sem býður upp á möguleika á þjálfun utandyra þegar vel viðrar.
Það er Berglind Elíasdóttir íþróttakennari sem kennir námkeiðið en Berglind lauk M.Ed. prófi í íþrótta- og heilsufræðum með áherslu á þjálfun eldri aldurshópa 2016.
Gísli H. Halldórsson bæjarstjóri kíkti við á fyrstu æfingunni í nýja íþróttahúsinu á Selfossvelli ásamt Díönu Gestsdóttur lýðheilsufulltrúa í Sveitarfélaginu Árborg, en hún kom einnig að skipulagningu verkefnisins.
Gaman er að segja frá því að sveitarfélagið Árborg ætlar í samvinnu við Berglindi að bjóða uppá heilsueflingu 60+ námskeið í Stað á Eyrabakka frá og með þriðjudeginum 12.október frá kl. 14-15. Allir velkomnir og engin skráning.
Markmið námskeiðsins er að viðhalda og efla heilsu fólks og gera einstaklingana sjálfbærari hvað varðar eigin heilsueflingu. Með því að huga vel að þessu aukum við tímann þar sem fólk getur sjálft sinnt athöfnum dagslegs lífs og eru betur í stakk búin að takast á við lífið. Heilsa er líkamleg, andleg og félagsleg vellíðan og þarf að huga að öllum þessum þremur þáttum í heilsueflingu. Lögð verður áhersla á styrktarþjálfun á námskeiðinu sem er afar mikilvæg á þessum aldri til að bregðast við einkennum öldrunar á borð við vöðvarýrnun, beinþynningu o.fl.. Ásamt því verður þol, jafnvægi og lipurð þjálfuð. Einstaklingum verður mætt þar sem þeir eru staddir í líkamlegri getu og allir fá æfingar við hæfi. Líkamleg þjálfun léttir lundina og að æfa í hóp gerir mikið fyrir félagsleg tengsl.