Opið bréf til íbúa á Selfossi
Frá skipuleggjendum Norrænar menningarhátíðar heyrnarlausra
Kæru Selfyssingar,
Dagana 29. júlí – 2. ágúst verður Norræn menningarhátíð heyrnarlausra haldin á Selfossi.
Hátíðin er haldin á fjögurra ára fresti og ferðast á milli Norðurlandanna. Síðast var hún haldin á Íslandi árið 2006, á Akureyri, og við erum einstaklega glöð að fá tækifæri til að halda hana nú á Selfossi. Bærinn býður upp á frábært umhverfi, góða aðstöðu og fallega náttúru sem við hlökkum til að sýna gestum okkar.
Við reiknum með að að minnsta kosti 250 gestir komi frá Norðurlöndunum. Því munu ýmis táknmál sjást víðs vegar um bæinn þessa daga.
Ef þið rekist á hóp af fólki sem er að tákna af miklum krafti, þá er engin ástæða til að hafa áhyggjur, þau eru bara að spjalla, hlæja og njóta lífsins.
Við hlökkum til að heimsækja Selfoss og vonum að bæjarbúar taki vel á móti gestunum okkar.
Nánari upplýsingar um hátíðina má nálgast hér https://ndkfestival2026.com/
