Orð eru ævintýri
Talmeinafræðingar Skólaþjónustu Árborgar vilja vekja athygli á að bókin Orð eru ævintýri, sem er gjöf til allra barna á Íslandi fædd 2018, 2019 og 2020, verður afhent leikskólum og leikskólabörnum í Árborg á næstu vikum.
Bókin er gefin út af Menntamálastofnun og Miðju máls og læsis og prýðir teikningar eftir Blævi Guðmundsdóttur, Böðvar Leós, Elínu Elísabetu Einarsdóttur og Sigmund Breiðfjörð Þorgeirsson.
Í tilefni útgáfu bókarinnar færðu talmeinafræðingar frá Skólaþjónustu sveitarfélagsins Bókasafni Árborgar tvö eintök af bókinni.
Um er að ræða litríka og skemmtilega myndaorðabók sem býður upp á mörg tækifæri til að spjalla um orð daglegs lífs og efla orðaforða á fjölbreyttan hátt. Aftast í bókinni eru stuttar leiðbeiningar um notkun og hugmyndir að umræðuefnum.
Vonast er til að þessi skemmtilega bók verði mikið notuð á öllum heimilum og leikskólum og að börn, foreldrar/forsjáraðilar og starfsfólk geti notið þess að lesa saman og læra ný orð. Bókin er einnig frábært verkfæri fyrir fullorðna og börn með annað mál að læra saman íslensku með því að nefna heitin á myndunum bæði á sínu tungumáli og á íslensku.
Bókalestur er afar mikilvægur og ein áhrifaríkasta leiðin til að efla orðaforða, málskilning, málfræði og setningauppbyggingu hjá börnum. Mikilvægt er að lesið sé daglega fyrir barnið fram eftir aldri. Með því að lesa fyrir það er verið að bæta málfar barnsins og stuðla að almennum þroska.
Skapið notalegar stundir án tækja eða truflana og gefið ykkur góðan tíma til að spjalla um orðin og myndirnar. Mikilvægt er að hafa bókina sýnilega, þar sem börnin hafa greiðan aðgang að henni.
Mælt er með því að skoða bókina aftur og aftur svo barnið fái tækifæri til að meðtaka efnið almennilega.
Munið að börn læra grundvallaratriði tungumálsins í gegnum samskipti og því er mikilvægt að þau fái mörg tækifæri til þess á sínu móðurmáli samhliða bókalestri.
Rafræn útgáfa af Orð eru ævintýri auk spila- og kennsluleiðbeininga
