Sveitarfélagið Árborg verður Heilsueflandi Samfélag
21. maí 2019
Sveitarfélagið Árborg hefur skrifað undir samning við Embætti landlæknis um að gerast heilsueflandi samfélag. Það voru Anna Möller, landlæknir og Gísli Halldór Halldórsson, bæjarstjóri sem skrifuðu undir samninginn í íþróttahúsinu IÐU á Selfossi. Viðstaddir voru m.a. bæjarfulltrúar, fulltrúar í stýrihópi Árborgar fyrir HSAM starfið og iðkendur handknattleiksdeildar Umf. Selfoss og körfuknattleiksfélags Selfoss.
Verkefnið Heilsueflandi samfélag hefur það að meginmarkmiði að styðja samfélög í að skapa umhverfi og aðstæður sem stuðla að heilbrigðum lifnaðarháttum, heilsu og vellíðan allra íbúa.
Leiðarljós Heilsueflandi samfélags eru:
- Virk þátttaka samfélagsins í heild, þ.m.t. hagsmunaaðila úr öllum geirum.
- Starfið byggir á bestu þekkingu og reynslu á hverjum tíma.
- Valda ekki skaða
- Jöfnuður til heilsu með almennum aðgerðum og aðgerðum sem taka mið af þörfum viðkvæmra hópa.
- Sjálfbærni, leggja áherslu á að skipuleggja starf og árangur til lengri tíma litið.
Sveitarfélagið Árborg hefur stofnað fimm manna stýrihóp um verkefni en hlutverk hópsins er að samþætta þau heilsueflandi verkefni sem eru í gangi í dag og koma nýjum verkefnum af stað í samráði við íbúa og fyrirtæki í samfélaginu.
