Útivist og afþreying í Sveitarfélaginu Árborg
Nú þegar samkomubann er í fullu gildi og margt úr skorðum í okkar daglegu rútínu er mikilvægt að nýta þá möguleika sem þó standa til boða til afþreyingar fyrir einstaklinga og fjölskyldur.
Fjölbreytt útivera er einn af valmöguleikunum og um að gera að nota hugmyndaflugið líkt og að búa til skemmtilega ratleiki úr göngutúrnum eða fjöruferðinni. Hér að neðan eru nokkrir möguleikar á svæðinu okkar til útiveru og afþreyingar en hvetjum alla til að nota hugmyndaflugið fyrir inni- og/eða útiveru en samt þar sem við á með tilliti til fjöldatakmarkana og nándar samkvæmt viðmiðum almannavarna.
Bókasöfn Árborgar á Selfossi, Eyrarbakka og Stokkseyri
Frá og með 24.mars verður bókasafnið á Selfossi lokað almenningi en boðið verður upp á heimsendingarþjónustu á bókum. Hægt er að panta bækur milli kl.10:00 og 18:00 alla virka daga með því að hringja í síma 480-1980 eða senda tölvupóst á afgreidsla@arborg.is. Nánari upplýsingar verða á heimsíðu og facebooksíðu bókasafnanna, http://bokasafn.arborg.is/.
Göngustígar og leiksvæði í sveitarfélaginu
Reynt er að halda öllum göngustígum í sveitarfélaginu opnum þrátt fyrir snjókomu. Frábær leið til útiveru að fara í góðan göngutúr, hlaupa eða hjóla og kannski leita að böngsum í glugga. Gönguferð í Hellisskóg eða fjöruferð við Eyrarbakka eða Stokkseyri er líka skemmtileg leið til útiveru fyrir alla fjölskylduna.
Öll leiksvæði í sveitarfélaginu eru opin en íbúar eru beðnir um að sýna ábyrgð gagnvart fjölda og nánd.
Hlaupabraut og gervigrasvöllur á Selfossvelli
Hlaupabrautirnar á frjálsíþróttavellinum eru öllum opnar og frjálst að nýta til að ganga eða hlaupa. Stóri gervigrasvöllurinn er líka opin en einstaklingar beðnir um að sýna ábyrgð varðandi fjölda og nánd.
Skíðagöngubraut á Svarfhólsvelli
Skíðagöngubrautin á golfvellinum verður opin eins og veður leyfir og þurfa notendur aðeins að koma með sinn eigin búnað.
GOS höllin á Svarfhólsvelli
Opið er fyrir almenning og félagsmenn í nýju GOS höllina þar sem hægt er að nýta æfingaaðstöðu og golfhermi innandyra. Notendur þurfa að mæta með sína eigin kylfur og golfbolta. Farið er eftir viðmiðum almannavarna og verða allir notendur að fylgja þeim. Nánar á https://gosgolf.is/.