Jól í Árborg 2025 - aðventu og jóladagskrá sveitarfélagsins

26. nóvember 2025

Næstkomandi sunnudag, sem er fyrsti sunnudagur í aðventu, verður kveikt á jólatrjánum við ströndina, kl. 16 á Eyrarbakka og kl. 17 á Stokkseyri. Dansað verður í kringum jólatrén með jólasveinum og öðrum gestum.

Laugardaginn 13. desember munu jólasveinarnir úr Ingólfsfjalli koma til byggða og heilsa upp á bæjarbúa og nærsveitunga á Brúartorginu í miðbæ Selfoss.

Jólatorgið á Eyrarbakka verður á sínum stað í ár með markaðsstemningu og handverki í jólakofum og í kjallara Rauða hússins. Byggðasafnið verður með opið sömu daga og Jólatorgið, sunnudagana 30. nóvember, 7. og 14. desember frá kl. 13 – 17. Þeirra dagskrá er hátíðleg að vanda.

Jólaböll og áramótabrennur, jólatónleikar og markaðir verða víða og í ár verður spennandi útileikhús fyrir börn í Hallskoti þann 6. desember, sannkallað jólaævintýri.

Íbúar eru hvattir til að kynna sér dagskrá Jól í Árborg og bæta sínum viðburðum við á viðburðadagatalið. Það er ómetanlegt hve örlátir einstaklingar og félagasamtök eru á tíma sinn þegar kemur að því að gera aðventu og jóladagskrá sveitarfélagsins sem fjölbreyttasta.

Jólaglugginn í Árborg 15 ára

Einn af föstum liðum á aðventunni í Árborg er Jólaglugginn, sem verður á sínum stað í fimmtánda sinn en þessi fallega jólahefð hófst árið 2010. Á hverjum degi frá 1.- 24. desember opnar fyrirtæki eða stofnun einn skreyttan jólaglugga sem inniheldur bókstaf. Sem fyrr opnar fyrsti jólaglugginn á Bókasafni Árborgar, Selfossi. Börn geta tekið þátt í jólaratleik með því að finna einn bókstaf á dag á mismunandi stöðum í sveitarfélaginu. Þau raða bókstöfunum saman og mynda með því vísu sem aðstoðar við að finna rétt svar. 

Verðlaun verða veitt þremur börnum með rétt leysta gátu. Þetta er ókeypis og skemmtileg samvera í desember fyrir fjölskyldur og hvetjum við fólk til þess að taka þátt. Þátttökublöð verður hægt að nálgast á bókasöfnum og í sundlaugum Árborgar. Gleðjumst saman á aðventu og jólum og setjum fjölskyldu- og vinasamveru í forgang.