Ljósmyndakeppni í tilefni af Barnamenningarhátíð 2026:„Árborg með augum barna“
Sveitarfélagið Árborg efnir til ljósmyndakeppni barna tilefni af Barnamenningarhátíð sem haldin verður á Vor í Árborg, dagana 22. - 26. apríl 2026.
Keppnin ber titilinn „Árborg með augum barna“ og óskað er eftir sjónarhorni barna á sínar heimaslóðir en myndirnar eru tjáning barnanna á umhverfi sínu.
Allar innsendar ljósmyndir verða metnar af dómnefnd, skipaðri af ljósmyndurum, bæði börnum og fullorðnum.
Veitt verða verðlaun fyrir bestu mynd í flokki 5 – 8 ára, 9 – 12 ára og 13 – 17 ára og verðlaunamyndir sendar áfram í Ljósmyndakeppni Suðurlands “Suðurland með augum barna” á vegum SASS þar sem myndir barna úr öllum sveitarfélögum Suðurlands taka þátt.
Hvernig tökum við þátt?
Með því að taka ljósmynd sem endurspeglar það hvernig ljósmyndarinn sér sitt umhverfi, sitt sveitarfélag. Ljósmyndin þarf að vera í góðum gæðum þar sem verðlaunamyndir verða prentaðar og til sýnis á ljósmyndasýningu í miðbæ Selfoss. Ljósmyndasýningar opna á opnunarhátíð Barnamenningarhátíðar miðvikudaginn 22. apríl kl. 17 í miðbæ Selfoss.
Umsóknarfrestur er til miðnættis 1. apríl og myndir þurfa að berast á netfangið barnamenning@arborg.is
